डोंबिवली : कल्याण डोंबिवली महानगरपालिका येथे एका लिपिकाकडून महिला कर्मचाऱ्याशी गैरवर्तन केल्याचा गंभीर प्रकार समोर आल्याने प्रशासनात खळबळ उडाली आहे. या प्रकरणी संबंधित लिपिक निलंबित करण्यात आले असून महानगरपालिकेत खळबळ उडाली आहे.
धमकी देत शरीर सुखाची मागणी
मिळालेल्या माहितीनुसार, जानेवारी महिन्यात एका कामावरून भूषण पाटील आणि पीडित महिला कर्मचारी यांच्यात वाद झाला होता. यावेळी पाटील याने सर्वासमक्ष तिला शिवीगाळ केली होती. या वादानंतर परिस्थिती शांत झाली असे वाटत असतानाच २० फेब्रुवारी रोजी रात्री आरोपीने पीडितेला फोन केला. त्यावेळी “तुला कामावरून काढण्याचे आदेश आले आहेत” असे सांगत, ही कारवाई थांबवायची असेल तर तर तुला मला जे हवं ते द्यावं लागेल... " असे म्हणत आरोपीने शरीर सुखाची मागणी केली आणि याचा दबाव टाकल्याचा आरोप महिलेने केला आहे.
मानपाडा पोलिसांत गुन्हा दाखल
या घटनेनंतर पीडितेने मानपाडा पोलीस ठाणे येथे तक्रार दाखल केली. पोलिसांनी तत्काळ गुन्हा नोंदवत तपास सुरू केला आहे. प्राथमिक तपासात प्रकरण गंभीर असल्याचे स्पष्ट झाले असून पुढील चौकशीत आणखी माहिती समोर येण्याची शक्यता वर्तवली जात आहे.
पालिकेकडून तात्काळ कारवाई
घटनेची माहिती मिळताच महापालिका आयुक्त अभिनव गोयल यांनी तातडीने कारवाई करत संबंधित लिपिकाला निलंबित करण्याचे आदेश दिले. तपासात कोणताही अडथळा येऊ नये, तसेच पुरावे आणि साक्षीदारांवर दबाव येऊ नये, यासाठी ही कारवाई करण्यात आल्याचे प्रशासनाने स्पष्ट केले.
महिला सुरक्षेचा प्रश्न पुन्हा ऐरणीवर
या घटनेमुळे सरकारी कार्यालयांतील महिला कर्मचाऱ्यांच्या सुरक्षिततेचा प्रश्न पुन्हा ऐरणीवर आला आहे. कार्यस्थळी सुरक्षित वातावरण निर्माण करण्यासाठी कठोर उपाययोजना करण्याची गरज व्यक्त केली जात असून, या प्रकरणाचा पुढील तपास पोलीस करत आहेत
