नवी दिल्ली: दिल्लीच्या विषारी हवेत श्वास घेणे कठीण होत असेल तर काय करावे? फक्त ५० रुपये द्या आणि हिमाचलच्या ताज्या पर्वतीय हवेचा आनंद घ्या. ही अनोखी आणि विनोदी कल्पना एका कल्पक तरुणाची आहे. या तरुणाचा व्हिडीओ सध्या सोशल मीडियावर व्हायरल होत आहे. हिमाचलच्या सहलीला गेलेल्या या मुलाने तिथली ताजी हवा बाटलीत भरून दिल्लीला परत आणली आणि कनॉट प्लेससारख्या गजबजलेल्या ठिकाणी विकायला सुरुवात केली.
हा व्हिडीओ 'deluxebhaiyaji' नावाच्या इंस्टाग्रामवर अकाऊंटवर शेअर केला आहे. या व्हिडिओमध्ये एक तरुण प्लास्टिकच्या बाटल्या आणि प्रेशर स्प्रेअरच्या साहाय्याने हिमाचल प्रदेशातील दऱ्यांमधून ताजी हवा घेताना दिसत आहे. बाटल्यांवर 'ताजी पर्वतीय हवा' असे लिहिलेले आहे. दिल्लीत पोहोचल्यावर तो लोकांना विचारतो, "भाऊ, दिल्लीच्या घाणेरड्या हवेला कंटाळलात का? ५० रुपयांमध्ये हिमाचलच्या शुद्ध हवेचा श्वास घ्या, अनुभव घ्या!" काही लोक उत्सुकतेपोटी थांबतात, बाटली उघडायला किंवा चेहऱ्यावर फवारायला सांगतात आणि म्हणतात, "व्वा, खरंच खूप वेगळं वाटतंय!"
तरुणाची युक्ती केवळ एक विनोद नाही, तर एक हुशार व्यावसायिक कल्पना म्हणूनही सिद्ध होत आहे. हिमाचलची थंड, शुद्ध आणि ऑक्सिजनयुक्त हवा दिल्लीच्या धूळयुक्त आणि धुरकट हवेपेक्षा पूर्णपणे वेगळी वाटते. खरेदीदारांमध्ये तरुण, नोकरदार आणि पर्यटकांचाही समावेश आहे. एका खरेदीदाराने सांगितले, "अगदी काही सेकंदांसाठी का होईना, मला पर्वतांची आठवण झाली." काही जण म्हणतात, "मी ती सफर पूर्ण केलीच पाहिजे," तर काही जण लिहितात, "उद्या कदाचित सूर्यप्रकाश आणि पाऊससुद्धा बाटल्यांमध्ये विकला जाईल." सर्जनशीलतेला कोणतीही सीमा नसते. या मुलाने हे सिद्ध केले आहे की एक साधी कल्पनासुद्धा व्हायरल होऊ शकते आणि विनोदाच्या माध्यमातून एक संदेश देऊ शकते.