पुणे : लोहगावच्या पुणे आंतरराष्ट्रीय विमानतळावर कस्टम्स विभागाने २६ कोटी ८० लाख रुपयांचा 'हायड्रोपोनिक गांजा' केला. एवढ्या मोठ्या प्रमाणात ड्रग जप्त झाल्यामुळे पुण्यात चाललंय काय अशी चर्चा सर्वत्र होत आहे. एअर कार्गो विभागात गुरुवारी कस्टम्स विभागाने ही कारवाई केली. या प्रकरणी आवश्यक ती कायदेशीर प्रक्रिया पूर्ण झाल्यानंतर अखेर कस्टम्सने प्रसारमाध्यमांना ही माहिती दिली.
थायलंडहून पुण्याच्या विमानतळावर एक कंटेनर आला. कागदपत्रांमध्ये चिनी खाद्यपदार्थांचा कंटेनर असा उल्लेख होता. पण संशय आल्यामुळे तपासणी करण्यात आली. 'मँडरिन ऑरेंज सॅक्स' असे लेबल थर्माकोलच्या बॉक्सवर होते. पण कस्टम्सने तपासणी करण्याचा निर्णय घेतला आणि बॉक्स तपासल्यावर त्यात सील असलेले टीनचे डबे आढळले. हे डबे उघडताच त्यात मीठसदृश्य पांढरी पावडर दिसली. ही पावडर बाजूला करताच टीनमध्ये हवाबंद पाकिटात भरून लपवलेला 'हायड्रोपोनिक गांजा' सापडला. एकूण ७६.५८ किलो वजनाचा २६ कोटी ८० लाख रुपयांचा 'हायड्रोपोनिक गांजा' कस्टम्सने जप्त केला. या प्रकरणी पुढील तपास सुरू आहे. ड्रग कोणी कोणासाठी पाठवले आहे ? याचा शोध सुरू आहे.