मुंबई : स्वतःला ज्योतिषी म्हणवत भविष्य सांगण्याच्या नावाखाली महिलांना जाळ्यात ओढून त्यांच्यावर लैंगिक अत्याचार करणारा आणि आर्थिक फसवणूक करणारा भोंदू बाबा अशोक खरात (Ashok Kharat) याच्याविरोधातील तपास अधिक गतीने सुरू आहे. गेल्या दोन आठवड्यांपासून पोलिस कोठडीत असलेल्या खरातची सखोल चौकशी सुरू असून त्याच्याशी संबंधित अनेक व्यक्तीही आता पोलिसांच्या रडारवर आल्या आहेत.
तपासात खरातने फसवणूक करून कोट्यवधींची संपत्ती उभी केल्याचे समोर आले आहे. त्याच्याकडे मोठ्या प्रमाणावर मालमत्ता, जमीन-जुमला असल्याची माहिती पुढे आली आहे.
शिवनिका ट्रस्टच्या व्यवहारांवरही संशय व्यक्त होत आहे. २०१८ मध्ये अवघी चार लाखांची उलाढाल असलेल्या या ट्रस्टने २०२४ पर्यंत कोट्यवधींची झेप घेतल्याने तपास यंत्रणा अधिक सतर्क झाली आहे. या व्यवहारांची सखोल चौकशी केली जाणार आहे.
दरम्यान खरातविरोधात अनेक महिलांनी पुढे येत तक्रारी नोंदवल्या असून प्रकरणाची व्याप्ती दिवसेंदिवस वाढत आहे. आता शिवनिका संस्थेच्या सर्व आजी-माजी सदस्यांची चौकशी होणार असून रुपाली चाकणकर (Rupali Chakankar) यांचीही चौकशी होण्याची शक्यता आहे. एसआयटीकडून संबंधितांना समन्स बजावण्यात आले असून या चौकशीतून आणखी मोठे खुलासे होण्याची शक्यता व्यक्त केली जात आहे.