बंगळुरू : कर्नाटकमध्ये प्रत्येक आमदाराला आयपीएलच्या राज्यातील शुभारंभाच्या सामन्याचे VIP पास मिळणार आहेत. आयपीएलसाठी कर्नाटक सरकारने धोरण निश्चित केले आहे. या धोरणानुसार कर्नाटकच्या प्रत्येक आमदाराला शुभारंभाच्या सामन्याचे प्रत्येकी दोन VIP पास मिळणार आहेत. सर्व VIP पासधारकांची एकाच ठिकाणी बसण्याची व्यवस्था केली जाणार आहे.
विधानसभेत VIP पाससाठी अनेक आमदारांनी आग्रही मागणी केली. विधानसभाध्यक्षांनी समजूत काढूनही आमदार शांत होत नसल्याचे बघून उपमुख्यमंत्री डी. के. शिवकुमार यांनी पुढाकार घेतला. त्यांनी सर्व व्हीआयपींसाठी एका स्टँडची व्यवस्था केली. यानंतर प्रत्येक आमदाराला शुभारंभाच्या सामन्याचे प्रत्येकी दोन VIP पास मिळतील, अशी घोषणा कर्नाटक सरकारने केली.
कर्नाटक क्रिकेट असोसिएशनचे अध्यक्ष व्यंकटेश प्रसाद यांच्याशी चर्चा करून उपमुख्यमंत्री डी. के. शिवकुमार यांनी आमदारांच्या VIP पासची सोय केली. नंतर मुख्यमंत्री सिद्धरामय्या यांच्याशी स्वतंत्रपणे चर्चा केली. यानंतर कर्नाटक सरकारने आमदारांच्या VIP पासबाबत अधिकृत घोषणा केली. उर्वरित सामन्यांबाबत नंतर चर्चा करून निर्णय घेऊ, असे उपमुख्यमंत्री डी. के. शिवकुमार म्हणाले.
सूत्रांनी दिलेल्या माहितीनुसार ३०० आमदार पाससाठी आग्रही होते. या सर्व आमदारांना प्रत्येकी दोन प्रमाणे ६०० पास मिळणार आहेत. या ६०० व्हीआयपींसाठी विशेष स्टँडची व्यवस्था करण्यात आली आहे.
आमदारांनी व्हीआयपी पासची मागणी केली आणि रांगेत उभे राहून तिकिटांची खरेदी करणार नाही, असे ठामपणे सांगितले. लोकप्रतिनिधी म्हणून मान राखला गेला पाहिजे अशी आमदारांची भूमिका होती. अखेर उपमुख्यमंत्री डी. के. शिवकुमार यांनी कर्नाटक क्रिकेट असोसिएशनचे अध्यक्ष व्यंकटेश प्रसाद यांच्याशी चर्चा करून आमदारांच्या पासची सोय केली.