स्वातंत्र्यवीरांच्या जीवनावरील 'रिसर्च प्रोजेक्ट'ला मंजुरी

डॉ. लक्ष्मीकांत बाहेगव्हाणकर करणार संशोधन

बीड : बीड येथील स्वातंत्र्यवीर सावरकर महाविद्यालयाचे उपप्राचार्य व इंग्रजी विभाग प्रमुख डॉ. लक्ष्मीकांत बाहेगव्हाणकर यांना भारत सरकारच्या शिक्षण मंत्रालयाच्या अंतर्गत 'इंडियन कौन्सिल ऑफ सोशल सायन्स रिसर्च' (ICSSR) कडून ६ लाखांचा रिसर्च प्रोजेक्ट मंजूर झाला आहे.

या प्रकल्पामार्फत स्वातंत्र्यवीर सावरकर यांचे साहित्य आणि सामाजिक कार्य यांचा सखोल अभ्यास केला जाणार आहे. डिसेंबर २०२५ मध्ये मेजर व मायनर रिसर्च प्रोजेक्टसाठी प्रस्ताव मागविण्यात आले होते. त्यामध्ये डॉ. बाहेगव्हाणकर यांनी "स्वातंत्र्यवीर सावरकर : ए लिटररी ल्युमिनरी अँड टायटन ऑफ द सोशल रिफॉर्म्स" या प्रकल्पाचा प्रस्ताव सादर केला आणि तो मंजूर झाला. प्रकल्पाचा कालावधी एक वर्ष असून, यासाठी ६ लाखांचा निधी उपलब्ध होणार आहे.

डॉ. बाहेगव्हाणकर हे सावरकर साहित्याचे नामवंत अभ्यासक आहेत. त्यांनी मागील २५ वर्षांत स्वातंत्र्यवीर सावरकर यांचे जीवनकार्य, साहित्य, सामाजिक व राजकीय कार्य, भाषाशुद्धी, लिपी सुधारणा व वैज्ञानिक दृष्टिकोन यावर हजारो व्याख्याने महाराष्ट्र आणि राज्याबाहेर दिली आहेत. तसेच 'हर घर सावरकर' उपक्रमात सक्रिय सहभाग घेतला असून, निवासस्थानी स्वातंत्र्यवीर सावरकर साहित्याचे सुसज्ज ग्रंथालय त्यांनी स्थापन केले आहे.