मुंबई : प्रभादेवी येथील प्रसिद्ध सिद्धिविनायक मंदिरात चोरीची घटना समोर आल्यानंतर शहरात खळबळ उडाली आहे. भक्तांच्या श्रद्धेचे केंद्र मानल्या जाणाऱ्या या मंदिरातच असा प्रकार घडल्याने आश्चर्य व्यक्त केले जात आहे.
मंदिरातील पुजारी कक्षात ठेवलेल्या दानपेटीतून सुमारे १० हजार रुपयांची रक्कम गायब झाल्याचे निदर्शनास आले. यानंतर मंदिर प्रशासनाने तातडीने पोलिसांकडे तक्रार नोंदवली.
तपासादरम्यान पोलिसांनी सीसीटीव्ही फुटेजची पाहणी केली असता या प्रकरणामागील धक्कादायक बाब उघडकीस आली. मंदिरातीलच एका कर्मचाऱ्याने हा प्रकार केल्याचे समोर आले आहे.
सदर कर्मचारी दानपेटीतून पैसे काढताना सीसीटीव्हीत कैद झाला असून त्याने चलाखीने बोटाच्या आकाराच्या कैचीच्या मदतीने रक्कम काढल्याचे दिसून आले. या पुराव्यांच्या आधारे पोलिसांनी संबंधित कर्मचाऱ्याला ताब्यात घेतले.
चौकशीदरम्यान आरोपीने गुन्ह्याची कबुली दिल्याची माहिती मिळत आहे. न्यायालयाने त्याला ३ दिवसांची पोलीस कोठडी सुनावली असून पुढील तपास सुरू आहे. सुरक्षेच्या कारणास्तव पोलिसांनी अद्याप नाव जाहीर केलेले नाही.
दरम्यान, या घटनेमुळे मंदिराच्या सुरक्षाव्यवस्थेबाबत प्रश्न उपस्थित होत असून भविष्यात अशा प्रकारांना आळा घालण्यासाठी उपाययोजना करण्याची गरज आहे.