अमेरिका-इस्रायल आणि इराण यांच्यात सुरू असलेल्या युद्धामुळे मध्यपूर्वेतील देशांसमोर मोठ्या अडचणी उभ्या राहिल्या आहेत. दरम्यान, शेजारी देशांबरोबर राजनैतिक तणाव वाढवत इराणने आता संयुक्त अरब अमिराती (यूएई) कडून अमेरिकन हल्ल्यांमुळे झालेल्या नुकसानीची भरपाई मागितली आहे. इराणने संयुक्त राष्ट्र संघ यांच्या महासचिवांना पत्र लिहून अमेरिकन हल्ल्यांमुळे झालेल्या नुकसानीसाठी यूएईकडून नुकसानभरपाईची मागणी केली आहे.
या पत्रात इराणचे संयुक्त राष्ट्रांतील राजदूत अमीर सईद इरवानी यांनी आरोप केला आहे की, अमेरिकेने इराणवर केलेल्या हल्ल्यांदरम्यान अमेरिकन सैन्याने संयुक्त अरब अमिरातीची जमीन वापरली. त्यामुळे अमेरिकेकडून झालेल्या हल्ल्यांमुळे इराणचे जे नुकसान झाले, त्याची भरपाई करण्याची जबाबदारी यूएईवर येते, असा दावा त्यांनी केला आहे.इराणचे संयुक्त राष्ट्रांतील राजदूत अमीर सईद इरवानी यांनी महासचिवांना दिलेल्या पत्रात नमूद केले आहे की, आंतरराष्ट्रीय कायद्यानुसार इराणला झालेल्या सर्व भौतिक आणि नैतिक नुकसानीची भरपाई देणे संबंधित देशांचे दायित्व आहे.
संयुक्त राष्ट्रांमध्ये इराणकडून हे पत्र सात तक्रारींनंतर देण्यात आले आहे. या सात तक्रारींमध्ये इराणने आरोप केला होता की, अमेरिका आणि इस्रायल यांनी इराणविरोधातील लष्करी कारवायांमध्ये प्रादेशिक देशांच्या हवाई क्षेत्राचा आणि जमिनीचा बेकायदेशीर वापर केला. दुसऱ्या एका पत्रात इराणने नमूद केले होते की, २८ फेब्रुवारी रोजी अमेरिकन दलांनी इराणवर हल्ला केला, जो आंतरराष्ट्रीय कायद्याच्या मूलभूत तत्त्वांचे उल्लंघन करणारा होता. तसेच या हल्ल्यात जॉर्डनसह काही प्रादेशिक देशांच्या जमिनीचा वापर करून अमेरिका-इस्रायलने इराणवर कारवाई केल्याचा आरोपही करण्यात आला आहे.