पोलिसांकडून २ कोटी रुपयांहून अधिकच्या नोटा जप्त
अहमदाबाद गुन्हे शाखेची मोठी कारवाई
अहमदाबाद : नाशिकमधील ज्योतिषी आणि भोंदूबाबा अशोक खरातचं लैंगिक शोषणाचे प्रकरण उघडकीस आल्यानंतर गुजरातमधील अजून एका बाबाचा कारनामा समोर आला आहे. या बाबाच्या आश्रमात गैरप्रकार चालू होता. त्याचे व्हिडिओ समोर आल्यानंतर देशभरात संतापाची लाट उसळली आहे. हा बाबा गुजरातमधील असून अहमदाबाद गुन्हे शाखेने त्याचा कारनामा समोर आणला आहे. या बाबाने सुरत येथे नकली नोटा छापणाऱ्या आश्रमाचा पर्दाफाश केला आहे. पोलिसांनी या आश्रमातून २कोटी रुपयांहून अधिकच्या नोटा जप्त केल्या आहेत.
सुरत जवळील कामरेज तालुक्यातील पारडी गावात ‘श्री सत्य योग फाउंडेशन’ या आश्रमात बाहेर धर्माचे पांघरूण घेऊन आत नकली नोटांचा गोरखधंदा सुरू होता. या बनावट नोट छापखान्याची माहिती गुन्हे शाखेला एक गुप्त प्रकारे मिळाली होती. त्यानुसार सुरत येथून नकली नोटांची एक मोठी खेप अहमदाबाद येथे आणण्यात येणार असल्याची माहिती पोलिसांना मिळाली.
पोलिसांनी या गुप्त माहितीच्या आधारे अमराईवाडी परिसरात नाकाबंदी केली होती. तिथे काही महिला आणि ६ पुरुषांच्या संशयास्पद हालचाली दिसून आल्या. त्यानंतर पोलिसांनी कारवाई करत त्यांना अटक केली. त्यावेळी त्यांच्याकडून ५०० रुपयांच्या ४० हजारांहून अधिक नकली नोटा हस्तगत करण्यात आल्या. या नोटांची एकूण किंमत जवळपास २ कोटी रुपये आहे. या आरोपींची चौकशी केल्यानंतर सुरत येथील वराछा या परिसरात या नोटा छापण्यात आल्याचे समोर आले. या नोटा बाजारात चालवण्यासाठी खास योजना आखण्यात आली होती. त्यानुसार खरी ५०० रुपयांची नोट द्या आणि १५०० रुपयांच्या नकली नोटा मिळवा,अशी स्कीम होती. या भामट्यांनी ६६ लाख खऱ्या नोटांच्या बदल्यात २ कोटी रुपयांच्या खोट्या नोटा बाजारात आणण्याची योजना आखली होती. पण त्यापूर्वीच पोलिसांनी त्यांचा भांडाफोड केला.
पोलिसांनी संबंधित आश्रमात छापा टाकत तेथून प्रिंटिंग मशीन, संगणक, खास कागद, रंग आदी साहित्य जप्त केले. यासह पोलिसांना काही महत्त्वाची कागदपत्रं हाती लागली आहेत. आश्रमातील वाहनांचा वापरही या नकली नोटांच्या रॅकेटसाठी करण्यात आल्याचे तपासात समोर आले आहे.