मुंबई : देशाची आर्थिक राजधानी अशी ओळख मिरवणाऱ्या मुंबईत राज्याचे अर्थसंकल्पीय अधिवेशन सुरू आहे. अधिवेशनाचा तिसरा आठवडा सुरू आहे. कामकाज सुरळीत सुरू आहे. अर्थसंकल्पही सादर करून झाला आहे. इतर कामकाज सुरू असताना गुरुवारी सकाळी एका अज्ञात व्यक्तीने विधानभवनात बॉम्ब ठेवल्याचा ई मेल पाठवला. हा ई मेल मिळताच पोलिसांची धावपळ झाली.
खबरदारीचा उपाय म्हणून पोलिसांनी विधानभवनातून अधिकारी आणि कर्मचारी यांना बाहेर काढून तातडीने तपासणी केली. तपासणी दरम्यान निव्वळ दहशत पसरवणे आणि सरकारी कामात अडथळा निर्माण करणे या हेतूने ई मेल केल्याचे लक्षात आले. यानंतर विधानभवनात कामकाजाला पुन्हा सुरुवात झाली. पोलिसांनी सायबर तज्ज्ञांच्या मदतीने धमकीचा ई मेल पाठवणाऱ्याचा शोध सुरू केला आहे. संबंधित व्यक्ती विरोधात कायदेशीर कारवाई केली जाणार आहे.
खलिस्तान समर्थक अज्ञाताने दिलेली धमकी
खलिस्तान समर्थक अज्ञाताने मुंबईचे विधानभवन बॉम्बने उडवून देण्याची धमकी देणारा ई मेल मुंबई पोलीस आयुक्तालयाला पाठवला. यानंतर अधिकारी आणि कर्मचारी यांना मोकळ्या जागेत थांबवून विधानभवनात तपासणी करण्यात आली. इमारतीत बॉम्ब नसल्याची खात्री झाल्यानंतर कामकाज सुरू करण्यात आले. धमकी देणाऱ्याचा शोध घेण्यासाठी सायबर तज्ज्ञांची मदत घेतली जात आहे.