वॉशिंग्टन डीसी : मुकेश अंबानींच्या रिलायन्स समुहाने अमेरिकेतील टेक्सास प्रांतात ३०० बिलियन यूएसडी म्हणजेच ३ अब्ज डॉलरची गुंतवणूक केली आहे. अमेरिकेचे अध्यक्ष डोनाल्ड ट्रम्प यांनी ट्रुथ या सोशल मीडिया प्लॅटफॉर्मवर पोस्ट करून ही माहिती दिली. टेक्सास प्रांतात मागील ५० वर्षांत एकही नवा कारखाना सुरू झाला नव्हता. रिलायन्सच्या रिफायनरीच्या (तेल शुद्धीकरण प्रकल्प) स्वरुपात टेक्सास प्रांतात प्रदीर्घ काळानंतर कारखाना सुरू होत आहे. ब्राउन्सव्हिले बंदराजवळ रिलायन्सची रिफायनरी सुरू होणार आहे.
वाढत्या प्रदूषणामुळे मागील ५० वर्ष टेक्सास प्रांतात नव्या कारखान्यांना मंजुरी दिली जात नव्हती. अखेर आता इराण विरुद्ध युद्ध सुरू असताना टेक्सासमध्ये रिलायन्सच्या रिफायनरीच्या स्वरुपात नव्या औद्योगिक प्रकल्पाला मंजुरी मिळाली आहे. लवकरच ही रिफायनरी सुरू होईल आणि भारतीय उद्योगसमूह अमेरिकेत तेलाचे शुद्धीकरण करेल.
अमेरिका आणि इस्रायलने इराणविरोधात युद्ध पुकारल्यानंतर जगावर ऊर्जा संकट ओढवले आहे. कच्च्या तेलाचे दर वाढले असून गॅसचा पुरवठा विस्कळित झाला आहे. अशावेळी डोनाल्ड ट्रम्प यांनी अमेरिकेतील टेक्सास प्रांतात रिलायन्स ३ अब्ज डॉलरची गुंतवणूक करून रिफायनरी सुरू करत असल्याचे जाहीर केले आहे. अमेरिकेच्या इतिहासातील सर्वात मोठा रिफायनरीचा करार झाला असल्याचेही ट्रम्प यांनी जाहीर केले आहे. टेक्सास प्रांताच्या दक्षिणेकडील भागासाठी ही खूप मोठी बाब असल्याचे ट्रम्प यांनी ट्रुथ या सोशल मीडिया प्लॅटफॉर्मवरील त्यांच्या पोस्टमध्ये नमूद केले आहे. भारतातील आमचे भागीदार आणि त्यांची सर्वात मोठी खासगी मालकी असलेल्या रिलायन्सचे आभार; असेही ट्रम्प यांनी त्यांच्या पोस्टमध्ये नमूद केले आहे.
