मुंबई : राष्ट्रवादी काँग्रेस पक्षाच्या राष्ट्रीय कार्यकारिणीची मुंबईत वरळीच्या डोममधील हॉलमध्ये बैठक झाली. या बैठकीला पक्षाचे देशातील सर्व खासदार, आमदार आणि प्रमुख पदाधिकारी उपस्थित होते. उपमुख्यमंत्री सुनेत्रा पवार, प्रफुल पटेल, सुनील तटकरे, छगन भुजबळ, धनंजय मुंडे, दिलीप वळसे पाटील, हसन मुश्रीफ, नरहरी झिरवाळ, पार्थ पवार हे पण बैठकीत उपस्थित होते. या बैठकीत राष्ट्रवादी काँग्रेसच्या राष्ट्रीय अध्यक्ष या पदासाठी सुनेत्रा अजित पवार यांच्या नावाचा प्रस्ताव सादर झाला. या प्रस्तावावर आवाजी मतदान झाले आणि सर्वानुमते सुनेत्रा पवार राष्ट्रवादी काँग्रेसच्या राष्ट्रीय अध्यक्ष झाल्या. या निवडीमुळे आता राष्ट्रवादी काँग्रेस पक्षात सुनेत्रापर्व सुरू झाले.
बैठकीत राष्ट्रवादी काँग्रेसचे कार्याध्यक्ष प्रफुल पटेल यांनी सुनेत्रा पवार यांच्या नावाचा प्रस्ताव सादर केला. तर राष्ट्रवादी काँग्रेसचे महाराष्ट्र प्रदेशाध्यक्ष सुनिल तटकरे यांनी प्रस्तावाला अनुमोदन दिले. यानंतर आवाजी मतदान झाले आणि सर्वानुमते सुनेत्रा पवार यांची पक्षाध्यक्षपदी निवड झाली.
अजित पवारांप्रमाणेच सुनेत्रा पवार यांच्या नेतृत्त्वात राष्ट्रवादी काँग्रेस पुन्हा भरारी घेईल, असा विश्वास कार्याध्यक्ष प्रफुल पटेल यांनी व्यक्त केला. ज्यांचं आमच्या पक्षाशी काहीही देणंघेणं नाही, ते आम्हाला उपदेश करत आहेत. महिन्याभरात तुम्ही पाहिलंच असेल. काही जण इकडे तिकडे फिरत आहेत. त्यांच्या पोटात एक आणि ओठात एक, अशी परिस्थिती आहे, असं म्हणत पटेलांनी रोहित पवारांचा नाव न घेता समाचार घेतला.
उपमुख्यमंत्री अजित पवार यांचं २८ जानेवारी २०२६ रोजी अपघाती निधन झालं. मुंबईहून बारामतीला जात असताना अजित पवारांच्या विमानाला अपघात झाला. त्यांच्या निधनानंतर तीन दिवसांनी सुनेत्रा पवार यांनी उपमुख्यमंत्रिपदाची शपथ घेतली. तेव्हापासूनच राष्ट्रवादी काँग्रेसचं राष्ट्रीय अध्यक्षपद कोणाकडे जाणार याबद्दलची चर्चा सुरु झाली. या चर्चेला आज पूर्णविराम मिळाला आहे.