मुंबई : "दिवंगत उपमुख्यमंत्री अजित पवार यांच्यासारखे थोर नेते फार कमी होतात. त्यामुळे त्यांनी ज्याप्रकारे महाराष्ट्राची सेवा केली, त्याची जाणिव पुढच्या पीढीला होण्यासाठी त्यांच्या नावाचे एक स्मृतीस्थान विधिमंडळाच्या आवारात होणे आवश्यक आहे. त्यासंदर्भात मुख्यमंत्री, गटनेते आणि बोर्डासमोर प्रस्ताव ठेवून मी निर्णय घेईन", अशी घोषणा विधानसभा अध्यक्ष राहुल नार्वेकर यांनी सोमवारी केली.
अजित पवार यांच्या निधनाबद्दल मुख्यमंत्री देवेंद्र फडणवीस यांनी मांडलेल्या शोक प्रस्तावावर बोलताना नार्वेकर म्हणाले, "मला माझ्या संसदीय कार्याची पहिली इनिंग सुरु करून दिली ती अजित पवार यांनी. त्यांनी मला पहिल्यांदा विधान परिषदेत काम करायची संधी दिली. त्याआधी मावळ लोकसभेची निवडणूक लढवण्याची सूचना त्यांनी केली होती. त्यात जरी यश मिळाले नाही, तरी तुमच्या राजकीय कारकीर्दीची ती सुरुवात असेल, असे त्यांनी सांगितले. या निवडणुकीत पराभव झाल्यानंतर अवघ्या २८ दिवसांत त्यांनी मला विधान परिषदेत काम करण्याची संधी दिली. शब्दाला जागणारा नेता, अशी त्यांची ओळख होती. हा जसा माझा अनुभव आहे, तसाच या सभागृहातील अनेकांचा आहे", असे राहुल नार्वेकर यांनी सांगितले.
अजितदादांनी दिली शाबासकी
- अजित पवार यांच्या आठवणी सांगताना राहुल नार्वेकर म्हणाले, "मी विधानसभा अध्यक्ष झाल्यानंतर विधान भवनाच्या सुशोभीकरणाचे काम हाती घेतले. काम पूर्ण झाल्यानंतर दादांनी माझी प्रशंसा केलीच. पण, कुठे काय कमतरता राहिली, हे देखील आवर्जून निदर्शनास आणून दिले. विशेष म्हणजे सह्याद्री अतिथिगृह हे विधिमंडळाच्या अखत्यारित येत नसले, तरी त्याच्या डागडुजीच्या कामात लक्ष घालून ते नीट करून घ्या, अशी सूचना त्यांनी केली होती".
- त्यांच्या जाण्याने केवळ राज्याची नव्हे, देशाची अपरिमित हानी झालेली आहे. जीएसटी कौन्सिलमधील त्यांच्या कामाची प्रशंसा देशपातळीवर झालेली आहे. जीएसटी कौन्सिलमध्ये महाराष्ट्राची बाजू अजितदादा ज्या तळमळीने मांडायचे, त्याची कसर आपल्याला कायम जाणवत राहील, असेही राहुल नार्वेकर यांनी सांगितले.