नवी दिल्ली : भारत आणि अमेरिका यांच्यातील मुक्त व्यापार कराराची बोलणी आधी २३ फेब्रुवारी रोजी होणार होती. ही चर्चा आता पुढे ढकलण्यात आली आहे. चर्चेचे नवे वेळापत्रक लवकरच जाहीर केले जाईल.
अमेरिकेचे अध्यक्ष डोनाल्ड ट्रम्प यांनी सर्व देशांवर सरसकट १५ टक्के वाढीव आयात शुल्क अर्थात टॅरिफ लावण्याचा निर्णय जाहीर केला आहे. अमेरिकेच्या सर्वोच्च न्यायालयाने ट्रम्प यांचा आधीचा टॅरिफचा निर्णय बेकायदा ठरवून रद्द केला होता. ट्रम्प यांनी अधिकारांचा गैरवापर केल्याचा ठपका अमेरिकेच्या सर्वोच्च न्यायालयाने त्यांच्यावर ठेवला होता. पण सर्वोच्च न्यायालयाच्या निर्णयाला केराची टोपली दाखवत ट्रम्प यांनी टॅरिफ संदर्भात नवा निर्णय जाहीर केला. यानंतर भारत आणि अमेरिका यांच्यातील मुक्त व्यापार कराराची बोलणी ढकलण्यात आल्याचे समजते.
आयात शुल्क अर्थात टॅरिफ संदर्भातली ताजी स्थिती विचारात घेऊन नव्याने काही मुद्यांवर चर्चा होणार आहे. यामुळे भारत आणि अमेरिका यांच्यातील मुक्त व्यापार कराराची बोलणी पुढे ढकलण्यात आली आहे.
अमेरिकेने ऑगस्ट २०२५ मध्ये भारतावर २५ टक्के अतिरिक्त टॅरिफ लादला होता. नंतर, रशियन कच्चे तेल खरेदी करण्यासाठी अतिरिक्त २५ टक्के टॅरिफ लादण्यात आला, ज्यामुळे भारतावरील एकूण टॅरिफ ५० टक्क्यांवर गेला. या महिन्याच्या सुरुवातीला भारत आणि अमेरिका यांनी हंगामी व्यापार कराराला अंतिम रूप देण्यासाठी एका चौकटीवर सहमती दर्शवली, ज्या अंतर्गत अमेरिका भारतावरील टॅरिफ १८ टक्क्यांवर आणेल असे ठरले. आतापर्यंत, दंडात्मक २५ टक्के टॅरिफ काढून टाकण्यात आले आहे. उर्वरित २५ टक्के टॅरिफ अस्तित्वात आहे. हे असतानाच ट्रम्प यांचा टॅरिफ बाबत नवा निर्णय आला. यामुळे भारताने टॅरिफबाबत स्पष्टतेची मागणी केली. यानंतर भारत आणि अमेरिका यांच्यातील मुक्त व्यापार कराराची बोलणी पुढे ढकलण्यात आल्याचे वृत्त आले आहे.