ती पुन्हा येतेय! मुंबईत नवीन अद्ययावत मोनोरेल लवकरच पुन्हा धावणार...

मुंबई : आधुनिकीकरण करण्यासाठी मुंबईतली मोनोरेलची सेवा सप्टेंबर २०२५ मध्ये बंद करण्यात आली. ही सेवा मे २०२६ किंवा त्याआधी नव्याने सुरू करण्याची घोषणा त्याचवेळी करण्यात आली होती. आता एमएमआरडीएने सोशल मिडिया पोस्ट करून मोनोरेल लवकरच सुरू होणार असल्याचे जाहीर केले आहे. मोनोरेलचे आधुनिकीकरण झाले आहे. तसेच मोनोरेलने आपल्या नवीन रोलिंग स्टॉक आणि CBTC-आधारित सिग्नलिंग प्रणालीसाठी आवश्यक सुरक्षा प्रमाणपत्र प्राप्त केले आहे. स्वतंत्र सुरक्षा मूल्यांकनकर्ता ही भूमिका पार पाडणाऱ्या 'ब्युरो व्हेरिटास' या जागतिक स्तरावरील चाचणी आणि तपासणी प्रमाणीकरण क्षेत्रातील अग्रगण्य संस्थेने मोनोरेलला सुरक्षा प्रमाणपत्र दिले आहे. हा एक अत्यंत महत्त्वपूर्ण टप्पा असून, सुधारित मोनोरेल सार्वजनिक सेवेसाठी सुरू करण्याच्या दिशेने आपण आणखी एक पाऊल पुढे पडले आहे.

आता पुढील टप्प्यात संपूर्ण १९.५४ किमी मोनोरेल कॉरिडॉरच्या सर्वसमावेशक तपासणीसाठी आणि प्रवासी सेवा पुन्हा सुरू करण्यासाठी अंतिम वैधानिक मंजुरी मिळावी, याकरिता सेवानिवृत्त मेट्रो रेल्वे सुरक्षा आयुक्तांची नियुक्ती केली जाईल. ही प्रक्रिया देखील लवकरच पूर्ण होण्याची अपेक्षा असून, त्यानंतर नवीन आणि सुधारित अद्ययावत मोनोरेल पुन्हा मुंबईकरांच्या सेवेत दाखल होईल.

ISA प्रमाणपत्र खालील महत्त्वाच्या टप्प्यांची यशस्वी पूर्तता झाल्यानंतर प्रदान करण्यात आले:

उत्पादन सुविधेत नवीन रोलिंग स्टॉकची सविस्तर तपासणी
परिचालन सज्जतेचे मूल्यांकन करण्यासाठी मोनोरेल कॉरिडॉरच्या विविध भागांवर दोन महिने कठोर चाचण्या
डिझाइन तपशील आणि सर्वोच्च सुरक्षा मानकांचे पूर्ण पालन सुनिश्चित करण्यासाठी विस्तृत स्टॅटिक आणि डायनॅमिक चाचणी
ऑसिलेशन चाचण्यांची पूर्तता
प्रगत CBTC-आधारित सिग्नलिंग प्रणालीची स्थापना आणि इंटरफेस-स्तरीय चाचणी

नवीन 'मेड इन इंडिया' मोनोरेल रेक्स

नवीन २१ 'मेड इन इंडिया' मोनोरेल रेक्स हे आधुनिक सुधारणांसह आले आहेत. प्रत्येक ट्रेनमध्ये सीसीटीव्ही कॅमेरे, दिव्यांगांसाठी अनुकूल आसनव्यवस्था, मोबाईल आणि लॅपटॉप चार्जिंग पॉइंट्स, डायनॅमिक मार्ग नकाशे, अधिक सुरळीत प्रवासासाठी सुधारित सस्पेन्शन, अग्निसुरक्षा मानकांचे कठोर पालन करणारे डिझाइन, आधुनिक मेट्रो-शैलीतील अंतर्गत सजावट आणि रिअल-टाईम मॉनिटरिंग व सर्व्हेलन्स प्रणाली आदी सोयीसुविधा आहेत. मुंबईकरांना लवकरच अधिक सुरक्षित, अधिक स्मार्ट आणि अधिक विश्वासार्ह मोनोरेल सेवा उपलब्ध होणार आहे, अशी माहिती एमएमआरडीएने दिली आहे.