मुंबई : हिंदवी स्वराज्याचे संस्थापक छत्रपती शिवाजी महाराज यांची ३९६ वी जयंती आज मुंबईत मोठ्या उत्साहात साजरी करण्यात आली. बृहन्मुंबई महानगरपालिकेतर्फे आयोजित मुख्य सोहळ्यात महाराष्ट्राचे राज्यपाल श्री. आचार्य देवव्रत आणि मुंबईच्या महापौर श्रीमती रितू राजेश तावडे यांनी छत्रपती शिवाजी महाराज मैदान (शिवाजी पार्क) येथील अश्वारूढ पुतळ्यास पुष्पहार अर्पण करून मानाचा मुजरा केला. शिवाजी पार्क येथील अभिवादनानंतर क्रीडा भवन येथे एक छोटेखानी सांस्कृतिक कार्यक्रम संपन्न झाला. या कार्यक्रमाच्या अध्यक्षस्थानी महापौर रितू राजेश तावडे होत्या. महापालिकेच्या संगीत व कला अकादमीच्या चमूने शिवरायांच्या जाज्वल्य इतिहासावर आधारित गौरवगीते सादर केली. या सादरीकरणाने प्रभावित होऊन राज्यपाल महोदयांनी अकादमीच्या चमूला ५१ हजार रुपयांचे पारितोषिक जाहीर केले.
मुंबई : राज्याच्या राजकारणात सध्या भेटीगाठींचे सत्र जोरात असून, मनसे अध्यक्ष राज ठाकरे यांनी बुधवारी रात्री उपमुख्यमंत्री एकनाथ शिंदे यांची ...
गेट वे ऑफ इंडिया आणि भायखळा येथेही मानवंदना
मुंबईच्या विविध ऐतिहासिक स्थळांवरही शिवजयंतीचा उत्साह पाहायला मिळाला. गेट वे ऑफ इंडिया मधील शिवरायांच्या अश्वारूढ पुतळ्यास महापौरांच्या हस्ते पुष्पहार अर्पण करण्यात आला. पहाटे ७ ते ९ या वेळेत सनई-चौघड्यांच्या सुरांनी परिसर दुमदुमला होता. श्री शिव छत्रपती मंडळाच्या सुहासिनींनी महाराजांची भावपूर्ण आरती केली. भायखळा मधील 'बाल शिवाजी'च्या पुतळ्यालाही मान्यवरांनी अभिवादन केले. यावेळी स्थानिक नगरसेवक रमाकांत रहाटे आणि प्राणिसंग्रहालयाचे संचालक उपस्थित होते. पालिकेच्या मुख्य सभागृहातील महाराजांच्या अर्धपुतळ्यास महापौरांनी पुष्पहार अर्पण करून प्रशासकीय स्तरावर शिवजयंती साजरी केली.
