बाजार उठवू… आणि डॅड कोण आहे ते दाखवू!” शिवसेना प्रवक्त्या डॉ. ज्योती वाघमारे यांचा गणेश नाईक यांच्यावर जोरदार पलटवार

नवी मुंबई :  “अमेरिकेत मुलं जन्माला घालता, पण मुंबईत स्वतःच्या रक्ताला नाव द्यायला तुमची ‘फाटते’? ज्याला बापाचं कर्तव्य निभावता येत नाही, त्याने दुसऱ्याचं अस्तित्व मिटवण्याच्या वल्गना करू नयेत!” अशा अत्यंत बोचऱ्या शब्दांत शिवसेना प्रवक्त्या डॉ. ज्योती वाघमारे यांनी गणेश नाईकांवर निशाणा साधला. तसेच “शिंदे साहेबांचे कपडे जितके स्वच्छ, तितकंच त्यांचं राजकारण पारदर्शक आहे. जास्त बोलाल तर नवी मुंबईत येऊन तुमचा बाजार उठवला जाईल!” असा सज्जड दमही त्यांनी दिला. या वक्तव्यामुळे नवी मुंबईतील राजकीय वातावरण चांगलेच तापले आहे.

मुख्यमंत्री एकनाथ शिंदे यांच्यावर टीका केल्यानंतर गणेश नाईक यांना उत्तर देताना वाघमारे यांनी थेट आक्रमक भूमिका घेतली. नवी मुंबईच्या राजकारणात स्वतःला ‘किंग’ समजणाऱ्यांचा मुखवटा आता उतरवण्याची वेळ आली असल्याचे सांगत त्यांनी “कुत्र्याचं शेपूट १२ महिने नळीत घातलं तरी वाकडं ते वाकडंच राहते. तीच अवस्था नाईकांची आहे,” असा टोला लगावला.

पुढे बोलताना त्यांनी नाईकांना भूतकाळाची आठवण करून दिली. "मंदा म्हात्रे यांनी तुमचा पराभव करून तुम्हाला ‘माजी’ केलं होतं, हे विसरलात का? तुमच्यासारखे छप्पन आले आणि गेले, पण शिंदे साहेबांच्या शिवसेनेच्या बालेकिल्ल्याची एक वीटही ढासळू शकली नाही,” असे त्या म्हणाल्या.

वाघमारे यांनी पुढे गंभीर आरोप करत “तुमचं घर वाईट आहे पण तुमचे धंदे ब्लॅक आहेत,” असा थेट हल्लाही चढवला. त्यानंतर त्यांनी पुन्हा एकदा इशारा देत नाईकांना आव्हान दिले की, शिंदे यांच्या नेतृत्वावर वारंवार टीका सहन केली जाणार नाही.

शेवटी त्यांनी इंग्रजी घोषणेद्वारे हल्लाबोल अधिक तीव्र करत म्हणाल्या, “If You Are Bad, Eknath Shinde Is Your DAD!” गणेश नाईक यांनी अलीकडेच मुख्यमंत्री एकनाथ शिंदे यांच्या नेतृत्वावर टीका केल्यानंतर त्याला दिलेले हे सर्वात आक्रमक उत्तर मानले जात आहे. नवी मुंबईत आता दोन्ही गटांतील राजकीय संघर्ष आणखी पेटण्याची चिन्हे दिसत असून पुढील प्रतिक्रिया काय येते याकडे राजकीय वर्तुळाचे लक्ष लागले आहे.