मुंबई (विशेष प्रतिनिधी) : मुंबईच्या महापौरपदी विराजमान होताच मुंबईतील महापालिका रुग्णालयांची आरोग्य व्यवस्था वसुधारण्यासाठी मी अचानक महापालिका रुग्णालयांना भेटी देणार असे जाहीर करणाऱ्या नवनिर्वाचित महापौर रितू तावडे यांनी शनिवारी गो एम वंडी येथील पंडित मदन मोहन मालवीय अर्थात जुन्या शताब्दी रुग्णालयाला शनिवारी अचानक भेट देत रुग्णांना मिळत असलेल्या उपचाराची आणि आरोग्य सेवेची माहिती घेतली.
गोवंडी येथील पंडित मदन मोहन मालवीय अर्थात जुन्या( शताब्दी )रुग्णालयाची मुंबईच्या महापौर रितू तावडे यांनी शनिवारी १४ फेब्रुवारी २०२६ रोजी सायंकाळी आकस्मिक पाहणी केली. महापौर रितू तावडे यांनी प्रथम अपघात विभाग, त्यानंतरमहिला वैद्यकीय रुग्ण कक्ष, प्रसूती कक्ष, पुरुष वैद्यकीय रुग्ण कक्ष, अतिदक्षता कक्षाला भेट देऊन रुग्णांशी संवाद साधला. त्याचबरोबर महिला कक्षात पिण्याच्या पाण्याची, बालकांसाठी स्वतंत्र पाळणाची व्यवस्था करण्याचे निर्देश दिले. तसेच दैनंदिनपणे कक्षाची स्वच्छता करण्याचे निर्देश दिले. जन्म-मृत्यू नोंदणी प्रमाणपत्र वितरित करण्याची रुग्णालयांची कार्यपद्धतीही समजावून घेतली. यावेळी प्रमुख वैद्यकीय अधिक्षक (माध्यमिक आरोग्य सेवा) डॉ. चंद्रकांत पवार उपस्थित होते.