मुंबई: आठवड्याच्या पहिल्याच दिवशी म्हणजे सोमवार ९ फेब्रुवारी रोजी सोन्या-चांदीच्या किमतींमध्ये वाढ झाली होती. मात्र आज मंगळवार १० फेब्रुवारी रोजी सोन्या-चांदीच्या दरात पुन्हा एकदा घसरण झाली आहे. ऐन लग्नसराईमध्ये ही घसरण झाल्याने ग्राहकांना काहीसा दिलासा मिळणार आहे.
गुंतवणूकदारांनी नफा वसुलीचं धोरण स्वीकारल्यामुळे मंगळवारी सकाळी वायदेबाजारात सोने आणि चांदीच्या दरात घसरण पाहायला मिळाली. मल्टी कमोडिटी एक्सचेंजवर एप्रिलच्या वायद्याचे सोन्याचे एका तोळ्याचे दर १.६ टक्क्यांनी म्हणजेच २५०० रुपयांनी घसरुन १,५५,५४६ रुपयांवर आले आहेत. तर, चांदीच्या वायद्याचे दर ४ टक्क्यांनी घसरले आहे. चांदीच्या दरात ११,००० रुपयांनी घसरण होऊन आता हे दर २,५१,५४४ रुपयांवर पोहोचले आहेत.
आंतरराष्ट्रीय बाजारात सोन्याच्या दरात सुरुवातीच्या ट्रेडिंगमध्ये १.४ टक्क्यांनी घसरले आहेत. सोन्याचे दर ५००० डॉलर प्रति औंसच्या खाली आले आहेत. २९ जानेवारीला सोन्याच्या दरानं उच्चांक गाठला होता, त्या तुलनेत सोन्याचे दर १० टक्क्यांनी घसरले आहेत. सिंगापूरमध्ये ८ वाजता स्पॉट गोल्ड ०.५ टक्क्यांनी घसरुन ५०३२.५३ डॉलर प्रति औंसवर आले आहेत. चांदीचे दर १.८ टक्के म्हणजे ८१.९२ डॉलरनं घसरले आहेत.
गेल्या काही दिवसांपासून सोन्याच्या किमती अस्थिर आहेत. त्याच पार्श्वभूमीवर सोमवारी सकाळी, इंडियन बुलियन अँड ज्वेलर्स असोसिएशन (IBJA) च्या आकडेवारीनुसार, २४ कॅरेट सोन्याची किंमत प्रति १० ग्रॅम १,५२,०७८ रुपये, IBJA च्या आकडेवारीनुसार, २३ कॅरेट सोन्याची किंमत प्रति १० ग्रॅम १,५१,४६९ रुपये, २२ कॅरेटची किंमत १,३९,३०३ रुपये आणि १८ कॅरेटची किंमत प्रति १० ग्रॅम १,१४,०५९ रुपये झाली आहे.