मुंबई : टी ट्वेंटी विश्वचषकातील भारताचा पहिला सामना मुंबईच्या वानखेडे स्टेडियमवर सुरू आहे. या सामन्यात नाणेफेक जिंकून अमेरिकेने गोलंदाजीचा निर्णय घेतला आहे. फलंदाजीसाठी मैदानात आलेल्या भारताच्या सलामीवीर अभिषेक शर्माने अनपेक्षित अशी कामगिरी केली. यामुळे त्याच्या नावावर भलत्याच विक्रमाची नोंद झाली आहे.
भारताचा सलामीवीर अभिषेक शर्मा पहिल्याच चेंडूवर शून्य धावा करून बाद झाला. अली खानच्या चेंडूवर मोठा फटका मारण्याच्या प्रयत्नात अभिषेक झेलबाद झाला. हा अभिषेक शर्माचा टी ट्वेंटी विश्वचषकातील पहिलाच सामना होता. पण या सामन्यात प्रभावी कामगिरी करणे त्याला जमले नाही.
अभिषेक शर्मा टी ट्वेंटी विश्वचषकात पदार्पणाच्या सामन्यात शून्यावर बाद होणारा पाचवा भारतीय खेळाडू झाला. या यादीत आधीपासूनच गौतम गंभीर, आशीष नेहरा, शार्दुल ठाकूर आणि दीपक हुडा आहेत. भारताने अमेरिकेविरुद्धच्या सामन्यात २० षटकांत नऊ बाद १६१ धावा केल्या आहेत. अभिषेक शर्माने शून्य, ईशान किशनने २०, तिलक वर्माने २५, सूर्यकुमार यादवने नाबाद ८४, शिवम दुबेने शून्य, रिंकू सिंगने ६, हार्दिक पांड्याने ५, अक्षर पटेलने १४, अर्शदीप सिंहने ४, वरुण चक्रवर्तीने नाबाद शून्य धावा केल्या आहेत.
सूर्यकुमारचा झंझावात
सूर्यकुमार यादवने ४९ चेंडूत चार षटकार आणि दहा चौकार मारत नाबाद ८४ धावा केल्या. सूर्याच्या झंझावातामुळेच भारताचे बाकीचे फलंदाज मोठी कामगिरी करू शकले नाही तरी भारतीय संघाने १५० धावांचा टप्पा पार केला.
भारत : ईशान किशन (यष्टीरक्षक) , अभिषेक शर्मा , तिलक वर्मा , सूर्यकुमार यादव (कर्णधार) , रिंकू सिंग , हार्दिक पांड्या , शिवम दुबे , अक्षर पटेल , वरुण चक्रवर्ती , अर्शदीप सिंग ,मोहम्मद सिराज
अमेरिका : अँड्रीस गॉस (यष्टीरक्षक) , सैतेजा मुक्कामल्ला , मोनंक पटेल (कर्णधार) , मिलिंद कुमार , संजय कृष्णमूर्ती , शुभम रांजणे , हरमीत सिंग , मोहम्मद मोहसीन , शॅडली व्हॅन शाल्कविक , अली खान , सौरभ नेत्रावलकर