मुंबई : मुंबईचे उपनगर असलेल्या अंधेरी पश्चिम भागातून धक्कादायक प्रकार समोर आला आहे. अंधेरीमधील नावाजलेला परिसर असलेल्या लोखंडवाला येथे एका मॉडेलच्या अंगावर कार घालण्याचा प्रयत्न केल्याने सगळीकडेच एकच खळबळ उडाली आहे. ही घटना साधारण रात्री साडेनऊच्या सुमारास घडली; घडलेला संपूर्ण प्रकार सीसीटीव्ही कॅमेऱ्यात कैद झाला आहे .
मिळालेल्या माहितीनुसार, अंधेरीतीलमधील लोखंडवाला परिसरात एका मॉडेलच्या अंगावर कार घालून तिला जीवे मारण्याचा प्रयत्न केल्याची घटना उघडकीस आली आहे. 'अरिना' इमारतीच्या प्रवेशद्वाराजवळ हा प्रकार घडला असून.याप्रकरणी ओशिवरा पोलिसांनी मोहम्मद शकील शेख (वय २९) या तरुणाविरोधात गुन्हा दाखल केला आहे.
मॉडेलच्या अंगावर कार का घातली?
मॉडेल तरुणी आणि आरोपीमध्ये सोशल मीडियावर वाद झाल्यामुळे हा प्रकार घडला आहे. आरोपीने काही दिवसांपूर्वी मॉडेलच्या मैत्रिणीला स्नॅपचॅटवर ॲसिड हल्ल्याची धमकी दिली होती. या प्रकरणाचा जाब विचारण्यासाठी मॉडेलने आरोपीला गाठले असता, रागाच्या भरात आरोपीने तिला इमारतीच्या बाहेर बोलावले आणि तिच्या अंगावर गाडी घालण्याचा प्रयत्न केला.
सुदैवाने या सर्व घटनेमध्ये मॉडेल तरुणी ही किरकोळ जखमी झाली आहे. मॉडेलच्या अंगावर जेव्हा आरोपी कार घालत होता तेव्हा तिला वाचवण्यासाठी आजूबाजूच्या नागरिकांनी तिला मदत करण्याच्या प्रयत्न केला असता आरोपीने त्यांच्यावरही कारद्वारे हल्ला करण्याचा प्रयत्न केला.