नवी दिल्ली : श्रीनगर - जम्मू-काश्मीरच्या किश्तवाड जिल्ह्यात लपून बसलेल्या जैश-ए-मोहम्मदच्या तीन दहशतवाद्यांचा शोध घेण्यासाठी सुरक्षा दलाने मोहीम सुरू केली आहे. सुरक्षा कारवाईदरम्यान दशतवाद्यांना कोणताही गैरफायदा घेता येऊ नये, यासाठी खबरदारीचा उपाय म्हणून या क्षेत्रातील मोबाइल व इंटरनेट सेवा बंद केली आहे.
सुरक्षा दलाने शुक्रवारी राबवलेल्या मोहिमेदरम्यान जिल्ह्यातील सिंहपोरा, चिंगम व चतर या भागातील सहा किमी क्षेत्रात मोबाइल व इंटरनेट सेवा तात्पुरती बंद करण्यात आली होती. दहशतवाद्यांच्या उपस्थितीबद्दल गुप्त माहिती मिळाल्यानंतर सुरक्षा दलाने १८ जानेवारी रोजी या क्षेत्रात मोहीम सुरू केली होती. त्यावेळी मंड्राल-सिंहपोराजवळील सोनार जंगलात दहशतवाद्यांसोबत उडालेल्या चकमकीत एक जवान शहीद, तर ७ जवान जखमी झाले होते. त्यानंतर २२ जानेवारीला माली डाना टॉप व २५ जानेवारी रोजी जनसीर-कांडीवार भागात पुन्हा दहशतवाद्यांशी चकमकी उडाल्या त्यावेळी दहशतवादी जंगलात पसार झाले होते.