मोहित सोमण: जागतिक स्तरावर अस्थिरतेचा फटका बसल्याने बाजार मूल्याप्रमाणे गुंतवणूकदारांचे ६ लाख कोटी एका दिवसात पाण्यात गेले आहेत. एका दिवसात सेन्सेक्स ७६९.६७ व निफ्टी २४१.२५ अंकांनी कोसळल्याने बाजारात मोठ्या प्रमाणात गुंतवणूकदारांना फटका बसला आहे. बाजारात सेल ऑफ व नफा बुकिंग होत असताना रूपयानेही आज ९१.९७ या निचांकी पातळीवर आपली घसरण नोंदवण्यात आल्याने मोठ्या प्रमाणात परदेशी संस्थात्मक गुंतवणूकदारांनी आपली गुंतवणूक बाजारातून काढून घेतली. मोठ्या प्रमाणात इक्विटीत घसरण झाल्याने बाजारात तब्बल ६ लाख कोटीचे नुकसान झाल्याचे आकडेवारीतून स्पष्ट झाले आहे. कारण बीएसई (BSE) बाजारात कंपन्यांचे बाजार भांडवल (Market Capitalisation) ४५२ लाख कोटींपर्यंत खाली आले.
दुसरीकडे बाजारातील तज्ञांनी सांगितले की, २०२५ मध्ये दिसलेला परदेशी विक्री आणि देशांतर्गत खरेदीचा पॅटर्न २०२६ मध्येही कायम आहे. दुसरीकडे नकारात्मक रिपोर्टनंतर अदानी समूहाच्या शेअर्समध्ये विक्रीचा जोर वाढला होता. ज्यामुळे व्यापक बाजारात सेल ऑफ मुळे अदानी शेअर्समध्ये घसरण झाली. गौतम अदानी आणि सागर अदानी यांना थेट समन्स बजावण्यासाठी यूएस एसईसीने न्यायालयाची परवानगी मागितल्याच्या वृत्तानंतर अदानी ग्रीन, अदानी एंटरप्राइजेस, अदानी एनर्जी आणि अदानी पोर्ट्सच्या शेअर्समध्ये एकत्रितपणे सुमारे ११% घसरण झाली. अदानी एंटरप्राईजेस (१०.७६%), अदानी एनर्जी (१०.७०%), अदानी ग्रीन एनर्जी (१३.८४%), अदानी पोर्ट अँड सेझ (६.९५%), अदानी टोटल गॅस (५.३६%), अंबुजा सिमेंट (४.९८%) समभागात घसरण झाली. त्यामुळे अखेरच्या सत्रादरम्यान समूहाचे एकत्रित बाजार मूल्य सुमारे १.१ लाख कोटी रुपयांनी घसरले आहेत.
एकूणच गुंतवणूकदारांनी केवळ जानेवारी महिन्यात प्रोविजनल आकडेवारीनुसार २५५० कोटींची रोख विक्री बाजारातून केली. जिओजित इन्व्हेस्टमेंट्सचे डॉ. व्ही. के. विजयकुमार यांच्या मते, जोपर्यंत कंपन्यांची कमाई लक्षणीयरीत्या सुधारत नाही किंवा केंद्रीय अर्थसंकल्पात बाजारासाठी अनुकूल मजबूत उपाययोजना केल्या जात नाहीत, तोपर्यंत परदेशी संस्थात्मक गुंतवणूकदार (FIIs) खरेदीदार होण्याची शक्यता नाही.