पुणे : पिंपरी-चिंचवड : औद्योगिक नगरी असलेल्या पिंपरी-चिंचवडमधील काळेवाडी परिसरात आज दुपारी आगीची एक मोठी घटना घडली. तापकीर चौकातील 'गजानन मल्टीस्पेशालिटी हॉस्पिटल' या खासगी रुग्णालयाच्या इमारतीत असलेल्या फटाक्यांच्या दुकानाला अचानक भीषण आग लागली. फटाक्यांनी पेट घेतल्यामुळे आगीचा भडका उडाला आणि काही क्षणांतच संपूर्ण दुकान आगीच्या भक्ष्यस्थानी पडले. ज्या इमारतीत ही आग लागली, तिथेच वरच्या मजल्यावर मल्टीस्पेशालिटी हॉस्पिटल असल्याने मोठी खळबळ उडाली. आगीच्या रौद्ररूपामुळे आणि फटाक्यांच्या आवाजांमुळे रुग्णालयातील रुग्ण आणि परिसरात असलेल्या नागरिकांमध्ये प्रचंड घबराट निर्माण झाली. धुराचे लोट परिसरात पसरल्याने श्वास घेण्यासही त्रास होत होता. घटनेची माहिती मिळताच पिंपरी-चिंचवड अग्निशमन दलाच्या गाड्या तातडीने घटनास्थळी पोहोचल्या. आगीवर नियंत्रण मिळवण्यासाठी जवानांकडून शर्थीचे प्रयत्न सुरू आहेत. प्राथमिक माहितीनुसार, आगीचे नेमके कारण अद्याप स्पष्ट झालेले नाही. सुदैवाने, या घटनेत आतापर्यंत कोणतीही जीवितहानी झाल्याचे वृत्त नाही, मात्र दुकानातील मालमत्तेचे मोठे नुकसान झाले आहे.
मुंबई : भारताचा महत्त्वाकांक्षी प्रकल्प असलेल्या मुंबई-अहमदाबाद बुलेट ट्रेनच्या कामाला मुंबईत अनपेक्षित खीळ बसली आहे. मुंबई महापालिकेने ...
अग्निशमन दलाचे ३ बंब घटनास्थळी
काळेवाडीतील तापकीर चौकात आज दुपारी एका भीषण आगीच्या घटनेने संपूर्ण परिसर हादरून गेला. 'गजानन मल्टीस्पेशालिटी हॉस्पिटल'च्या इमारतीतील फटाक्यांच्या दुकानाला लागलेल्या आगीने रौद्ररूप धारण केले आहे. या घटनेचे गांभीर्य अधिक वाढले कारण या जळत्या दुकानाच्या अगदी शेजारीच सिलेंडर दुरुस्तीचे दुकान आहे. फटाके आणि सिलेंडर असा दुहेरी धोका निर्माण झाल्याने प्रशासनाने तातडीने परिसर रिकामा करण्यास सुरुवात केली आहे. घटनेची भीषणता पाहता अग्निशमन दलाचे ३ अग्निबंब (Fire Tenders) तातडीने घटनास्थळी दाखल झाले आहेत. जवानांकडून आगीवर नियंत्रण मिळवण्यासाठी शर्थीचे प्रयत्न केले जात आहेत. आगीचे नेमके कारण अद्याप समजू शकलेले नाही, मात्र दुकानातील फटाक्यांच्या सतत होणाऱ्या स्फोटांमुळे आग विझवताना अडथळे येत आहेत.
रुग्णालयात कुणी अडकले आहे का? तपास सुरू
सर्वात मोठी चिंता इमारतीतील खासगी रुग्णालयाबाबत व्यक्त केली जात आहे. रुग्णालयामध्ये रुग्ण किंवा त्यांचे नातेवाईक आगीच्या धुरामुळे अडकले आहेत का, याचा शोध अग्निशमन दलाचे जवान घेत आहेत. धुराचे लोट थेट वरच्या मजल्यावर गेल्याने रुग्णांच्या सुरक्षेचा प्रश्न निर्माण झाला आहे. सुदैवाने, आतापर्यंत या आगीत कोणी अडकल्याची किंवा जखमी झाल्याची अधिकृत माहिती समोर आलेली नाही. फटाक्यांच्या दुकानाशेजारीच सिलेंडरचे दुकान असल्याने मोठा स्फोट होण्याची भीती नागरिकांमध्ये आहे. खबरदारीचा उपाय म्हणून परिसरातील वीजपुरवठा खंडित करण्यात आला असून पोलिसांनी तापकीर चौकात येणारे रस्ते बॅरिकेड्स लावून बंद केले आहेत.