रियाध : तेलाच्या विहिरी तसेच मक्का आणि मदिना यामुळे इस्लाम धर्मियांमध्ये प्रचंड महत्त्व असलेल्या सौदी अरेबिया या देशाने मोठी कारवाई केली. या कारवाईअंतर्गत सौदी अरेबियाने त्यांच्या देशात बेकायदा वास्तव्य करत भीक मागत असलेल्या ५६ हजार पाकिस्तानी भिकाऱ्यांना देशातून हाकलून दिले. सौदीच्या शाही सुरक्षा पथकांनी पाकिस्तानी भिकाऱ्यांना विमानात बसवून पाकिस्तानला पाठवून दिले. पाकिस्तानमध्ये पाठवण्याआधी सौदीने भिकाऱ्यांचे फोटो काढून त्यांची रितसर नोंद केली. या भिकाऱ्यांना सौदीत पुन्हा भीक मागण्यासाठी प्रवेश दिला जाणार नाही.
एका अहवालानुसार पाकिस्तानचे भिकारी परदेशात भिकेच्या स्वरुपात दरवर्षी ४२ अब्ज रुपयांची कमाई करतात. पण हे भिकारी संबंधित देशातील नागरिकांना वेगवेगळ्या प्रकारे इतका त्रास देतात की संबंधित देशाचे सरकार काही महिन्यांनी किंवा काही वर्षांनी भिकाऱ्यांना जबरदस्तीने पाकिस्तानमध्ये पाठवून देते. हे प्रकार वारंवार होत असले तरी दरवर्षी बनावट कागदपत्रे दाखवून हजारो पाकिस्तानी भिकारी भीक मागण्यासाठी सौदी अरेबियासह विविध आखाती देशांमध्ये प्रवेश करतात. यामुळे पाकिस्तानी भिकारी ही आखाती देशांसाठी एक नवी गंभीर समस्या झाली आहे. सौदी अरेबिया, यूएई, ओमान हे देश तर पाकिस्तानच्या भिकाऱ्यांच्या त्रासाने त्रस्त झाले आहेत.