अबू धाबी : इराण-अमेरिका-इस्रायल युद्धाच्या पार्श्वभूमीवर दुबईमध्ये मोठी दुर्घटना घडली आहे. दुबई आंतरराष्ट्रीय विमानतळाजवळ (DXB) दोन ड्रोन पाडण्यात आले, ज्यामध्ये एका भारतीय नागरिकासह चार जण जखमी झाले. दुबई मीडिया ऑफिसने सोशल मीडिया प्लॅटफॉर्म एक्स वर पोस्ट करत म्हटले आहे की सुरक्षा एजन्सींनी विमानतळाजवळ उडणारे दोन ड्रोन पाडले. हे ड्रोन नंतर विमानतळाजवळ पडले आणि जवळपासचे लोक जखमी झाले
दुबई मीडिया ऑफिसने अधिकृतपणे पुष्टी केली आहे की काही वेळापूर्वी दुबई आंतरराष्ट्रीय विमानतळ (डीएक्सबी) परिसरात दोन ड्रोन कोसळले. या घटनेत चार जण जखमी झाले असून त्यात दोन घानाचे नागरिक, एक बांगलादेशी नागरिक आणि एक भारतीय नागरिक यांचा समावेश आहे. सर्वांना किरकोळ दुखापत झाली आहे
हे ड्रोन इराणमधून आले होते की इतर कोणत्या कारणामुळे कोसळले, हे अद्याप स्पष्ट झालेले नाही. मात्र सुरू असलेल्या युद्धामुळे परिसरात इराणी ड्रोन आणि क्षेपणास्त्र हल्ल्यांच्या पार्श्वभूमीवर सुरक्षा सतर्कता अत्यंत उच्च स्तरावर ठेवण्यात आली आहे. यूएईच्या एअर डिफेन्स सिस्टिमने मागील काही तासांत अनेक ड्रोन आणि क्षेपणास्त्रे अडवून निष्क्रिय केली आहेत. दुबई विमानतळ हा जगातील सर्वाधिक वर्दळीच्या विमानतळांपैकी एक आहे. तरीही सध्या विमानसेवा पूर्णपणे सुरळीत सुरू असून कोणताही मोठा व्यत्यय आलेला नाही.
ही घटना अशा वेळी घडली आहे, जेव्हा इराणने गल्फ देशांवर — यूएई, सौदी अरेबिया, कतार, बहरीन आणि कुवैत — प्रतिहल्ले तीव्र केले आहेत. अबू धाबीतील रुवैस रिफायनरीवर झालेल्या ड्रोन हल्ल्यानंतर तेथे आग लागली होती आणि रिफायनरी तात्पुरती बंद करावी लागली. दुबईतील जखमी भारतीय नागरिकाच्या प्रकृतीवर भारत सरकार आणि भारतीय दूतावास बारकाईने लक्ष ठेवून असून आवश्यक मदत पुरविण्याची तयारी करण्यात आली आहे.
२८ फेब्रुवारी २०२६ रोजी युद्ध सुरू झाल्यापासून हे हल्ले सुरूच आहेत. इराणने गल्फ देशांवर शेकडो क्षेपणास्त्रे आणि ड्रोन डागले असून यूएईसारख्या देशांनी त्यापैकी बहुतेक हल्ले अडवले आहेत.
दरम्यान, भारत सरकारने यूएईमध्ये राहणाऱ्या भारतीय नागरिकांसाठी अॅडव्हायजरी जारी केली आहे. दुबई आणि अबू धाबीमध्ये राहणाऱ्या भारतीयांनी सतर्क राहावेआणि स्थानिक प्रशासनाच्या सूचनांचे पालन करावे, असा सल्ला देण्यात आला आहे. कोणताही भारतीय नागरिक प्रभावित झाल्यास दुबईतील भारतीय दूतावास (+९७१-४-३९७१२२२) किंवा अबू धाबीतील भारतीय दूतावास (+९७१-२-४४९२७००) यांच्याशी संपर्क साधावा.