मुंबई : बिग बॉस मराठीच्या पाचव्या पर्वाचा विजेता सूरज चव्हाण याचा विवाहसोहळा पुरंदर तालुक्यातील खळद येथील माऊली गार्डन येथे मोठ्या थाटामाटात पार पडला. २९ नोव्हेंबरला पार पडलेल्या या लग्नाची सोशल मीडियावर गेल्या काही दिवसांपासून जोरदार चर्चा होती. हळद, मेहंदीपासून लग्नापर्यंतचे सर्व विधी चाहत्यांनी अक्षरशः उचलून धरले आणि त्याचे व्हिडिओ सोशल मीडियावर व्हायरल झाले.
याच दरम्यान मंडपात झालेल्या गोंधळाचा एक व्हिडिओ विशेष चर्चेत आला आहे. बिग बॉस फेम जान्हवी किल्लेकरने भर मंडपात माईक हातात घेत पाहुण्यांना शांत राहण्याची विनंती केली. अचानक वाढलेली गर्दी आणि तिच्या हालचालींमुळे सुरजला बाहेर यायला जमत नसल्याने तिने जमलेल्या गर्दीला एक विंनती केली. लग्नस्थळावर चाहत्यांची प्रचंड गर्दी झाली होती. सोशल मीडियावर व्हायरल झालेल्या लग्नपत्रिकेमुळेही उत्सुकता वाढली आणि पाहुण्यांसह अनेक जण समारंभस्थळी दाखल झाले. सुरक्षेसाठी तब्बल ५० हून अधिक बॉडीगार्ड तैनात करण्यात आले होते, तरीही काही वेळ परिस्थिती नियंत्रणाबाहेर जात असल्यासारखी दिसली.
या गोंधळाच्या पार्श्वभूमीवर जान्हवी किल्लेकरने माईक हातात घेत उपस्थितांना शांत राहण्याचं आवाहन केलं. “आपण सुरजच्या लग्नाला आलोय, आधी त्याचं लग्न तर होऊ द्या. तो आत बसलाय आणि वैतागलाय. कृपया थोडं सहकार्य करा. सगळ्यांचीच डोकी फिरली आहेत, आता सुरजला बाहेर येऊ द्या,” असे म्हणत तिने पाहुण्यांना संयम बाळगण्याची विनंती केली.
सुरजच्या लग्नसोहळ्यात जान्हवी करवलीची भूमिका बजावत होती. हळद, मेहंदी, लग्नापर्यंत जवळपास प्रत्येक विधीत ती दिसली. वरातीतही ती सुरजच्या गाडीत सोबत नाचत असलेले व्हिडिओ व्हायरल झाले आहेत. संपूर्ण समारंभात तिने सक्रिय भूमिका बजावल्यामुळे चाहत्यांकडून तिचं मोठं कौतुक होत आहे.