सासवडमध्ये आरोप-प्रत्यारोप : सासवड नगरपरिषदेच्या निवडणुकीत भाजप, शिवसेना (शिंदेसेना), शिवसेना (उबाठा) या राजकीय पक्षांतच लढत आहे. निवडणुकीचा प्रचार शिगेला पोहोचल्याने आरोप-प्रत्यारोपांनाही उधाण आले आहे. दोन पॅनलचे उमेदवार व कार्यकर्ते अधिकाधिक मतदारांपर्यंत पोहोचण्याची घाई करत आहेत. राष्ट्रवादी काँग्रेसच्या पॅनलविरुद्ध भाजप, राष्ट्रवादी काँग्रेस (शरद पवार गट), शिवसेनेच्या (शिंदे गट) आणि इतर लहान-मोठ्या पक्षांनी एकत्र येत उभारलेल्या कृष्णा-भीमा विकास आघाडी पॅनलमधील सरळ सामना सुरू आहे. दौंड नगरपरिषदेच्या निवडणुकीत नागरिक हित संरक्षण मंडळ आणि त्यांचे मित्रपक्ष तसेच राष्ट्रवादी काँग्रेस (अजित पवार गट) आणि त्यांच्या मित्रपक्षांमध्ये थेट लढत होत आहे.
चाकणकर हैराण, बारामतीत राजकीय समीकरणे बदलली: चाकण नगरपरिषदेच्या निवडणूक प्रचाराला जोर आहे. प्रचार वाहनांवरील स्पीकरमधून होणाऱ्या कर्कश आवाजामुळे नागरिक त्रस्त झाले आहेत. राजगुरूनगर नगरपरिषदेच्या निवडणुकीसाठी चुरशीची चौरंगी लढत होणार आहे. नगराध्यक्षपदासाठी भाजप, शिवसेना, राष्ट्रवादी आणि शिवसेना (उद्धवसेना) यांच्या गटांमध्ये लढत रंगणार आहे. बारामती नगरपरिषदेचे मतदान फक्त चार दिवसांवर आले आहे. राष्ट्रवादी काँग्रेसचे नेते आणि कार्यकर्ते दोन्ही पक्षांतील फुटीमुळे विभागले आहेत. राजकीय विरोधक असलेला भाजप राष्ट्रवादी काँग्रेसचा (अजित पवार गट) मित्र बनला आहे.
आळंदीत चुरस, मंचरमध्ये सभांचा धडाका: आळंदीतील नगरपरिषद निवडणूक चुरशीची होणार आहे. भाजप आणि राष्ट्रवादी काँग्रेस (अजित पवार गट) यांच्यात थेट लढत पाहायला मिळत आहे. शिवसेना (शिंदेसेना) आणि शिवसेना (उबाठा) यांचे उमेदवारही काही प्रभागांमध्ये निर्णायक भूमिका बजावताना दिसत आहेत. या निवडणुकीत राष्ट्रवादी (शरद पवार गट) आणि मनसेने कोणतीही जागा लढवली नाही. मंचर नगरपंचायतीसाठी उपमुख्यमंत्री अजित पवार, एकनाथ शिंदे यांची सभा घेत प्रचाराचा धडाका लावला आहे.
आमदारांची प्रतिष्ठा पणाला: भोरमध्ये आजी-माजी आमदारांची प्रतिष्ठाही पणाला लागली आहे. दोन्ही पक्षांकडून घरोघरी प्रचार सुरू आहे. आरोप-प्रत्यारोपांच्या फैरी झडत आहेत. भोर नगरपालिकेच्या निवडणुकीत भाजप आणि राष्ट्रवादी काँग्रेसच्या (अजित पवार गट) यांच्यात मुख्य लढत आहे. दोन ठिकाणी शिवसेना आणि एका ठिकाणी काँग्रेसचे उमेदवार तसेच सहा अपक्ष उमेदवार निवडणूक लढवत आहेत.