सॉफ्टवेअर अपग्रेडसाठी विमानसेवा स्थगित करण्याचा निर्णय! प्रवाशांनी विमानतळावर जाण्यापूर्वी परिस्थिती तपासावी, इंडीगोची सूचना

मुंबई: जगातील सर्वाधिक विक्री होणारी एअरबस ए३२० विमाने सॉफ्टवेअर अपग्रेडसाठी स्थगित करण्यात येणार आहेत. यामुळे भारतासह जगभरातील विमानप्रवासाला फटका बसणार आहे. एअरबसने तीव्र सौर किरणोत्सर्गामुळे ए३२० फॅमिली विमानांमधील फ्लाइट कंट्रोल सिस्टमद्वारे वापरला जाणारा डेटा करप्ट होण्याची भीती व्यक्त केल्यानंतर, इंडिगो, एअर इंडिया आणि एअर इंडिया एक्सप्रेस या विमान कंपन्यांनी सॉफ्टवेअर अपग्रेडसाठी विमानसेवा स्थगित करण्याचा निर्णय घेतला आहे.

मिळालेल्या माहितीनुसार, भारतातील २०० ते २५० विमानांना ताल्लेगळ सॉफ्टवेअर अपग्रेड किंवा हार्डवेअर री-अलाइनमेंटची आवश्यकता असल्यामुळे दुरुस्ती कामासाठी विमान कंपन्यांना विमानसेवा थांबवावी लागणार आहे. भारतात, इंडिगो आणि एअर इंडिया ग्रुपच्या ३५० हून अधिक ए३२० विमानांची उड्डाणे या अपग्रेडसाठी थांबवली जाणार आहेत. अपग्रेडसाठी दोन ते तीन दिवस लागणार असल्याने विमान सेवा सुरळीत होण्यासाठी पुढील आठवडा उजाडणार असल्याचा अंदाज आहे.

अमेरिकन विमान कंपनी जेटब्लूचे कॅनकुन ते न्यूआर्क हे ए३२० विमान ३० ऑक्टोबर २०२५ रोजी पायलटच्या सूचनांशिवाय अनपेक्षितपणे खाली उतरले होते. या घटनेच्या पार्श्वभूमीवर एअरबस विमानांचे सॉफ्टवेअर अपग्रेड करण्याचा निर्णय घेण्यात आला आहे. नॅशनल ट्रान्सपोर्टेशन सेफ्टी बोर्डाच्या म्हणण्यानुसार, हे विमान अनियंत्रितपणे खाली उतरल्याने प्रवाशांमध्ये भीतीचे वातावरण निर्माण झाले. ज्यामुळे काही प्रवाशांना रुग्णालयात दाखल करावे लागले होते.

इंडिगोने दिलेल्या माहितीमध्ये सांगण्यात आले आहे की, "एअरबसने जागतिक ए३२० ताफ्यासाठी तांत्रिक सल्लागार जारी केला आहे. आम्ही आमच्या विमानांवरील अनिवार्य अपग्रेड पूर्ण काळजीने आणि सर्व सुरक्षा प्रोटोकॉलनुसार पूर्ण करत आहोत. आम्ही या सावधगिरीच्या अपग्रेडवर काम करत असताना, काही उड्डाणांच्या वेळापत्रकात काही किरकोळ बदल होऊ शकतात. आमचे पथक तुम्हाला पुन्हा तिकीट बुकिंग, अपडेट्स आणि माहितीसह मदत करण्यासाठी सदैव तयार आहे. विमानतळावर जाण्यापूर्वी कृपया आमच्या अॅप/वेबसाइटवर तुमची विमान स्थिती तपासा."