मुंबई : दिल्ली पोलिसांनी गेल्या ४८ तासांत मोठ्या प्रमाणावर सायबर गुन्हेगारीविरोधात मोहीम राबवत शेकडो फसवणूक रॅकेट्सचा पर्दाफाश केला आहे. ‘ऑपरेशन सायहॉक’ असे नाव असलेल्या या कारवाईत तब्बल ४,४६७ जणांना चौकशीसाठी ताब्यात घेण्यात आले असून तांत्रिक पुरावे आणि विश्लेषणाच्या आधारावर ८७७ जणांना अटक करण्यात आली.
ही कारवाई केंद्रीय गृहमंत्रालयाच्या भारतीय सायबर क्राईम कोऑर्डिनेशन सेंटरच्या समन्वयाने पार पडली. नवी दिल्ली परिसरात चालणारे सायबर फसवणूक रॅकेट्स, म्यूल अकाउंट्स, रोख रक्कम काढणारे एजंट आणि बेकायदा कॉल सेंटर्स यांच्यावर ही धडक मोहीम लक्ष्यित करण्यात आली होती. गुन्हा घडल्यानंतरच्या प्रतिक्रियेऐवजी, गुन्हेगारीचे मूळ उद्ध्वस्त करण्यासाठी ही महत्वाची प्रक्रीया असल्याचे पोलिसांनी सांगितले.
या तपासणीदरम्यान १,००० कोटींहून अधिक रकमेचे संशयास्पद आर्थिक व्यवहार उघड झाले. हे व्यवहार दिल्लीतील संघटित सायबर सिंडिकेट्सकडून चालवल्या जाणाऱ्या म्यूल अकाउंट्समधून फिरवल्याचा संशय असल्याची माहिती संयुक्त पोलीस आयुक्त (इंटेलिजन्स फ्युजन अँड स्ट्रॅटेजिक ऑपरेशन्स) रजनीश गुप्ता यांनी दिली.
दोन दिवस चाललेल्या या मोहिमेत ३६० नवीन गुन्हे दाखल झाले. नोकरीच्या आमिषाने फसवणूक, गुंतवणूक घोटाळे, ग्राहकसेवा प्रतिनिधींचे खोटे रूप धारण करणे, टेक-सपोर्ट फसवणूक अशा विविध प्रकारच्या गुन्ह्यांत वापरली जाणारी अनेक बेकायदा कॉल सेंटर उद्ध्वस्त करण्यात आली आहेत. दरम्यान मोबाइल फोन, लॅपटॉप, हार्ड ड्राइव्ह, सिम कार्डस्, आर्थिक नोंदी आणि डिजिटल पुरावे असे मोठ्या प्रमाणात साहित्य पोलिसांनी जप्त केले असून पुढील तपास सुरू आहे.