आई - मुलाच्या गोष्टीत झळकणार लोकप्रिय कलाकार
मुंबई : जन्माच्या आधीपासूनच आपल्या आईशी आपलं नातं जुळलेलं असत. आई आपल्यासाठी अनेक भूमिका बजावत असते. आपल्या मुलाच्या पाठीशी कायम खंबीरपणे उभी असते. अश्या आई - मुलाच्या नात्याची आजच्या परिभाषेतील संवेदनशील गोष्ट सांगणाऱ्या 'उत्तर' या चित्रपटाचा टिझर नुकताच रिलीज झाला आहे. झी स्टुडिओज आणि जॅकपॉट एंटरटेनमेंटची निर्मित असलेल्या या चित्रपटाद्वारे लेखक क्षितिज पटवर्धन दिग्दर्शनात पदार्पण करतो आहे. झी स्टुडिओजचे उमेशकुमार बन्सल आणि भावेश जानवेलकर व जॅकपॉट एंटरटेनमेंट मयूर हरदास आणि संपदा वाघ यांनी या चित्रपटाची निर्मिती केली आहे.
'उत्तर' या सिनेमात अभिनेत्री रेणुका शहाणे आईच्या भूमिकेत झळकणार असून अभिनय बेर्डे त्यांच्या मुलाची भूमिका साकारतो आहे. अभिनेत्री ऋता दुर्गुळेची ही या सिनेमात महत्वाची भूमिका आहे. पुढील महिन्यात १२ डिसेंबर रोजी हा सिनेमा रिलीज होणार आहे.
झी स्टुडिओजमध्ये आजवर 'डबलसीट','फास्टर फेणे','धुराळा',सारख्या गाजलेल्या सिनेमाचं चित्रपटांचं लेखन करणाऱ्या शिवाय हिंदीमध्येही 'सिंघम २' सारख्या ब्लॉकबस्टर चित्रपटाचं आणि 'ताली' यासारख्या संवेदनशील वेब सीरिजचं लेखन करणाऱ्या क्षितिजने 'उत्तर' ची कथा पटकथा लिहिली आहे. शिवाय तो या सिनेमातून दिग्दर्शनात पदार्पण करतो आहे. या सिनेमाबद्दल त्याने म्हटले की ,"आईला आपण नेहमी गृहीत धरलेलं असत, त्यामुळेच जवळच असूनही दुर्लक्ष होणार नातं आहे. तिचा फक्त "व्यक्ती" म्हणून विचार करणारी आणि 'आई आणि मुलं ' या नात्याचा नव्याने विचार करायला लावणारी कलाकृती करायची यातून 'उत्तर' हा सिनेमा जन्माला आला.
झी स्टुडिओजच्या मराठीचे व्यवसाय प्रमुख बवेश जानवेलकर प्रतिक्रिया देताना म्हणाले की 'जेव्हा चित्रपटाची कथा क्षितिजने ऐकवली तेव्हाच त्या विषयाची ताकद आमच्या लक्षात आली. आई आणि मुलाच्या नात्यावर भाष्य करणारी, ही आजच्या पिढीची गोष्ट प्रत्येक प्रेक्षकाला भावणारी आहे. हा चित्रपट मराठी भाषेतला असला तरी यातील भावना ही "वैश्विक" आहे आणि ती प्रत्येकाला आपलीशी वाटावी अशीच आहे.