नाशिक जिल्ह्यातील पवन सुखदेव खैरनार (३६ रा. साईकृपा अपार्टमेंट, जेलरोड, नाशिक) यांनी पाथर्डी पोलीस ठाण्यात फिर्याद दिली. यात म्हटले आहे की, पवन व त्यांचा भाऊ अमोल खैरनार लहान मुलांच्या कुटुंबासह किरायच्या टेम्पो ट्रॅव्हलने २८ ऑक्टोबरला तुळजापुर,अक्कलकोट,पंढरपुर,कोल्हापुर,जेजुरी देवस्थानला गेले होते. ३१ ऑक्टोबर रोजी सायंकाळी ६ वाजता मढी येथेदेवदर्शनासाठी गेले. परतीच्या मार्गावर ९ वाजता त्रिभुवनवाडी, कौडगाव, जोहारवाडी रस्त्याने जात असताना खांडगाव येथील आश्रमशाळेजवळ पाठीमागून येत काही जणांनी पांढऱ्या रंगाची स्विफ्ट कार त्यांच्या टेम्पो ट्रॅव्हलसमोर लावली. त्यातून पाच ते सहा जण लोखंडी रॉड, लाकडी दांडके घेऊन खाली उतरले. एकाने डोक्याला गावठी पिस्तुल लावून ठार मारण्याची धमकी दिली. गाडीत असणाऱ्या कुटुंबातील महिलांच्या अंगावरील कर्णफले, गंठण, अंगठी असा सुमारे पाऊणे नऊ तोळे सोन्याचे दागिने व रोख १६ हजार ५०० रुपये असा ऐवज बळजबरीने काढून घेतले.
आरडाओरड ऐकून स्थानिक ग्रामस्थांनी घटनास्थळाकडे धाव घेतली. स्थानिक लोक घटनास्थळाकडे येत असल्याचे पाहताच चोरटे पसार झाले. पाथर्डी पोलिस ठाण्यात गुन्हा दाखल करण्यात आला. पुढील तपास पाथर्डी पोलीस करत आहेत. तीन दिवसांपूर्वी गंठण हिसकावले दरम्यान, तीन दिवसांपूर्वी करंजी घाटाजवळ अज्ञात चोरट्यांनी दिपिका पालवे या महिलेच्या गळ्यातील १३ ग्रॅम सोन्याचे गंठण पळवले होते. तीन, चार दिवसापूर्वी करंजीजवळ गटाचे पैसे गोळा करणाऱ्या एका व्यक्तीस अज्ञात चोरट्यांनी भरदुपारी मारहाण करुन त्याच्याजवळील पैशाची पिशवी हिसकावून नेली होती. मात्र, अशा घटनांचा तपास लागत नसल्याने पोलिसांविषयी नाराजीचे वातावरण आहे. घटनेचे गांभीर्य लक्षात घेता पोलीस अधीक्षक सोमनाथ घार्गे, अतिरिक्त अधीक्षक वैभव कलबुर्गे, उपविभागीय अधिकारी नीरज राजगुरू व स्थानिक गुन्हे शाखेचे निरीक्षक किरणकुमार कबाडी हे स्वतः घटनास्थळी दाखल झाले. त्यांनी तपासाची चक्रे फिरवली. घटनास्थळावरून पोलिसांनी गुन्ह्यात वापरलेली स्विफ्ट कार, दोन दुचाकी जप्त केल्या असून काही संशयित आरोपींना ताब्यात घेतल्याची माहिती समोर येत आहे.