काकीनाडा: बंगालच्या उपसागरातून आलेले 'मोंथा' (Montha) चक्रीवादळ अधिक तीव्र झाले असून, ते आज मंगळवार, २८ ऑक्टोबर २०२५ रोजी रात्री आंध्र प्रदेशच्या किनारपट्टीवर काकीनाडा (Kakinada) जवळ धडकणार आहे.
'मोंथा' चक्रीवादळ वेगाने उत्तर-उत्तर-पश्चिम दिशेने सरकत आहे. हवामान खात्याच्या अंदाजानुसार, आज रात्री उशिरा हे वादळ मछलीपट्टनम आणि कलिंगपट्टनम दरम्यान काकीनाडाजवळ किनाऱ्याला धडकेल. लँडफॉलच्या वेळी वाऱ्याचा कमाल वेग ९० ते १०० कि.मी. प्रतितास असेल, जो ११० कि.मी. प्रतितास पर्यंत वाढण्याची शक्यता आहे.
वादळ धडकताना समुद्रात एक मीटरपेक्षा अधिक उंचीच्या लाटा उसळण्याची भीती आहे. यामुळे किनारपट्टीच्या सखल भागांत पाणी शिरण्याचा धोका आहे. आंध्र प्रदेशातील काकीनाडा, कोनासीमा, पश्चिम गोदावरी, एलुरू आणि पूर्व गोदावरी या जिल्ह्यांसह एकूण १६ जिल्ह्यांमध्ये 'रेड अलर्ट' (अतिदक्षता) जारी करण्यात आला आहे.
आंध्र प्रदेशात आज (२८ ऑक्टोबर) आणि उद्या (२९ ऑक्टोबर) काही ठिकाणी अतिवृष्टी ते अतिवृष्टीपेक्षा जास्त पाऊस (२० सेमी पेक्षा अधिक) होण्याची शक्यता आहे.
तीन राज्यांमध्ये मोठा परिणाम
आंध्र प्रदेश: वादळाचा सर्वाधिक धोका असलेल्या किनारपट्टीवरील गावांमधून जवळपास १०,००० हून अधिक लोकांना सुरक्षित निवारा केंद्रांमध्ये हलवण्यात आले आहे. यामध्ये सुमारे १२६ गर्भवती महिलांना रुग्णालयात दाखल करण्यात आले आहे. मुख्यमंत्री एन. चंद्राबाबू नायडू यांनी कोणत्याही परिस्थितीत जीवितहानी होऊ नये, यासाठी अधिकाऱ्यांना चोवीस तास परिस्थितीवर लक्ष ठेवण्याचे आणि बचावकार्यासाठी सज्ज राहण्याचे निर्देश दिले आहेत. रेल्वे आणि विमान सेवा मोठ्या प्रमाणावर बाधित झाल्या आहेत. जिल्ह्यातील सर्व शैक्षणिक संस्थांची सुट्टी जाहीर करण्यात आली आहे.
ओडिशा: आंध्र प्रदेशच्या जवळ असलेल्या दक्षिण ओडिशातील गंजम, गजपती, रायगड यांसारख्या आठ जिल्ह्यांसाठी रेड अलर्ट जारी करण्यात आला आहे. सरकारने संवेदनशील भागातून ३,००० हून अधिक लोकांना सुरक्षित स्थळी हलवले आहे. एनडीआरएफच्या टीम्स तैनात आहेत.
तामिळनाडू (चेन्नई): वादळ आंध्र प्रदेशकडे सरकत असले तरी, याच्या प्रभावामुळे तामिळनाडूच्या उत्तर किनारपट्टीवरील चेन्नई, तिरुवल्लूर, कांचीपुरम आणि रानीपेट या जिल्ह्यांमध्ये जोरदार ते अति जोरदार पाऊस होण्याची शक्यता आहे. खबरदारीचा उपाय म्हणून चेन्नई आणि तिरुवल्लूरमधील शाळा आज बंद ठेवण्यात आल्या आहेत.
संरक्षण दले सज्ज
राष्ट्रीय आपत्ती प्रतिसाद दलाची (NDRF), लष्कर, नौदल आणि तटरक्षक दलाची पथके (Indian Coast Guard) बचाव आणि मदत कार्यासाठी पूर्णपणे सज्ज ठेवण्यात आली आहेत. मच्छिमारांना २९ ऑक्टोबरपर्यंत समुद्रात न जाण्याची सक्त ताकीद देण्यात आली आहे.