मुंबई : ओटीटी विश्वातील 'I popstar' या कार्यक्रमाचा प्रोमो झळकला आणि लक्ष वेधून घेतलं ते गोड आवाजाच्या गोड दिसणाऱ्या कोकण कन्या राधिका भिडे हिने. तिच्या गोड आवाजातलं 'मन धावतया' हे गाणं आजकाल सर्वांच्याच ओठांवर आहे. तिच्या या मधाळ आवाजाने तिने प्रेक्षकांचेच नव्हे तर 'I Popstar' मधील जजेसचे देखील मन जिंकून घेतले आहे.
या कार्यक्रमात तिने गायलेली 'मन धावतंया' आणि 'पुन्हा पुन्हा' ही दोन्ही गाणी सोशल मीडियावर मोठ्या प्रमाणात व्हायरल होत आहे. या कार्यक्रमातील अनुभवाविषयी बोलताना राधिका म्हणाली 'दर आठवड्याला दिलेल्या थीमवर आधारित गाणं लिहून ते सादर करण्यापर्यंत सगळं काही स्पर्धकांना सादर करण्याची संधी देणारा हा एकमेव रिअॅलिटी शो आहे. माझ्या 'मन धावतया' या गाण्याला कार्यक्रमाच्या मंचावर आणि सोशल मीडियावर प्रचंड प्रतिसाद मिळतोय. तो प्रतिसाद एवढा आहे की, इंस्टाग्रामवर माझे फॉलोअर्स ८६ हजारांच्या वर गेले आहे. मला नेहमीच स्वतःची गाणी सादर करायची होती. त्यासाठी आवश्यक असणाऱ्या व्यासपीठाच्या शोधात होते. तो या कार्यक्रमामुळे मिळाला आहे. या संपूर्ण प्रक्रियेमध्ये गाण्याचे शब्द सुचणे हे मोठं आव्हानात्मक आहे. या आवाहनाला सामोरं जाताना माझ्यातील कौशल्यांचा कस लागत आहे.
'I Popstar' या कार्यक्रमात देशातील विविध भागांमधून निवडलेल्या स्पर्धकांना स्वतः गाणी लिहून, त्याला संगीत देऊन ती परीक्षकांसमोर सादर करायची असतात. एवढंच नाही तर त्यांनी सादर केलेली गाणी ही सोशल मीडियावर देखील शेअर केली जातात, ती शेअर केलेली गाणी सोशल मीडियावर किती व्हायरल होत आहेत. हे पॉईंट्स देखील फायनलसाठी मोजले जाणार आहेत. या रिअॅलिटी शोच्या आधी राधिकाने हिंदी सिरीज 'ताजा खबर' आणि 'दे धक्का २' व 'हर हर महादेव' या मराठी सिनेमांसाठी बॅकग्राऊंड स्कोअरिंग आणि व्होकल प्रॉडक्शनचं काम पाहिलं आहे. याशिवाय तिने काही गुजराती गाण्यांसाठी बॅकग्राऊंड स्कोअरिंगच काम केलं आहे. तसंच तिची गाणी देखील लवकरच प्रदर्शित होणार आहेत.