मुंबई : सचित पाटील दिग्दर्शित आगामी मराठी सस्पेन्स थ्रिलर ‘असंभव’ चित्रपटाने नुकताच प्रदर्शित झालेल्या पोस्टर्स आणि टीझरमुळे प्रेक्षकांच्या मनात गूढतेची आणि उत्कंठेची नवी लाट निर्माण केली आहे. चित्रपटाच्या पोस्टर्समधील गडद लाल आणि काळ्या रंगातील छटा पाहून प्रेक्षकांना अनेक प्रश्न पडत आहेत. सचित पाटील, मुक्ता बर्वे आणि प्रिया बापट यांचे चेहरे आणि भाव चित्रपटातील रहस्याची चाहूल देत आहे.
टीझरमध्ये मुक्ता बर्वे एका भयभीत स्त्रीच्या भूमिकेत दिसते, तर प्रिया बापटचे पात्रही अनेक रहस्ये उलगडण्याची शक्यता दर्शवते. हवेलीत दडलेले काही गुपित, अचानक घडणाऱ्या घटनांमुळे सस्पेन्स प्रचंड वाढतो. कथानकात एका रहस्यमय हत्येचा समावेश असून, पात्रांमध्ये गुंतागुंत, प्रेम, भीती आणि संघर्ष यांचे मिश्रण पाहायला मिळणार आहे.
दिग्दर्शक सचित पाटील यांनी सांगितले की, ‘असंभव’ हा केवळ रहस्यपट नसून मानवी मनाच्या खोलवर जाणारा एक मनोवैज्ञानिक प्रवास आहे, ज्यात प्रत्येक पात्राच्या आयुष्यातील गूढ उलगडले जातील. निर्माते नितीन प्रकाश वैद्य यांनी सांगितले की, पारंपरिक रहस्यपटाच्या चौकटीला मोडून हा चित्रपट प्रेक्षकांना पूर्णपणे वेगळा आणि विसरता न येण्याजोगा अनुभव देईल.
चित्रपटाचे सहदिग्दर्शन पुष्कर श्रोत्री यांनी केले असून, प्रमुख भूमिकांमध्ये सचित पाटील, मुक्ता बर्वे, प्रिया बापट आणि संदीप कुलकर्णी आहेत. चित्रपटाचे चित्रीकरण नयनरम्य नैनितालमध्ये करण्यात आले असून, तांत्रिकदृष्ट्या आणि सिनेमॅटिक दृष्टीनेही ‘असंभव’ एक उल्लेखनीय काम ठरल्याचे सांगितले जात आहे.
एरिकॉन टेलिफिल्म्स आणि पी अँड पी एंटरटेनमेंटच्या सहकार्याने साकारलेला ‘असंभव’ मराठी सिनेमात सस्पेन्स थ्रिलरच्या नव्या स्तरावर नेणारा चित्रपट ठरणार आहे. प्रेक्षकांना याचा अनुभव पाहताना भावनिक गुंतागुंत आणि थरार यांचा अद्भुत संगम बघायला मिळणार आहे, असे दिग्दर्शक व निर्माते दोघेही मानतात.