नवी मुंबई : मुंबई-पुणे एक्सप्रेसवे आणि पनवेल-कर्जत रेल्वे मार्गालगत स्थित असल्यामुळे, पनवेल हे ठिकाण सध्या झपाट्याने विकसित होत असून, एक उदयोन्मुख रिअल इस्टेट केंद्र म्हणून नावारूपाला येत आहे. आयटी पार्क, शिक्षणसंस्था आणि औद्योगिक प्रकल्पांच्या स्थापनेमुळे हा परिसर अनेक व्यावसायिक आणि कुटुंबांचा पसंतीचा झाला आहे. त्याचप्रमाणे, नवी मुंबई आंतरराष्ट्रीय विमानतळ आणि अटल सेतू यांसारख्या महत्त्वाकांक्षी प्रकल्पांमुळे येत्या काळात येथील किंमतींमध्ये मोठी वाढ अपेक्षित आहे.
याच पार्श्वभूमीवर, बॉलिवूड अभिनेता सोनू सूद याने ०.०६५० हेक्टर (सुमारे ७७७ चौ. यार्ड) इतक्या क्षेत्रफळाची जमीन पनवेलमध्ये विकत घेतली आहे. या व्यवहारासाठी ६.३ लाख रुपये स्टॅम्प ड्युटी आणि ३०,००० रुपये नोंदणी शुल्क भरण्यात आले आहे. या मालमत्तेची सुमारे किंमत १.०५ कोटी रुपये आहे. ही गुंतवणूक भविष्यातील मूल्यवाढ लक्षात घेता महत्त्वाची मानली जात आहे.
सोनू सूदने २००० च्या दशकात आपल्या अभिनय प्रवासाची सुरुवात केली. हिंदी आणि दक्षिण भारतीय चित्रपटांमधील विविध भूमिकांमुळे तो प्रसिद्ध आहे. त्याने खलनायक, नायक आणि सामाजिक कार्यकर्ता अशा विविध रूपात प्रेक्षकांची मने जिंकली आहेत. विशेषतः कोविड-१९ महामारी दरम्यान त्याने हजारो गरजू आणि अडकलेल्या नागरिकांना त्यांच्या घरी पोहोचवण्यात मदत करून लोकांचा विश्वास संपादन केला.