व्यावसायिक राज कुंद्रा आणि त्याची पत्नी बॉलिवूड अभिनेत्री शिल्पा शेट्टी या दोघांवर आर्थिक गैरव्यवहार केल्याचा आरोप आहे. या प्रकरणात कायदेशीर कारवाई सुरू आहे. ही कारवाई सुरू असेपर्यंत देशाबाहेर जाण्यास राज आणि शिल्पा या दोघांना मनाई करण्यात आली आहे. पण परदेशी जाणे आवश्यक आहे असा पवित्रा घेत शिल्पाने न्यायालयाकडे परवानगी मागितली आहे. या विनंती अर्जावर सुनावणी घेतल्यावर मुंबई उच्च न्यायालयाने शिल्पाला आधी साठ कोटी रुपये न्यायालयीन कस्टडीत जमा करा, असा आदेश दिला. या आदेशाविरोधात सर्वोच्च न्यायालयात दाद मागणे अथवा पैसे न्यायालयीन कस्टडीत जमा करणे हे दोनच पर्याय राज आणि शिल्पा यांच्याकडे आहेत.
पोर्नोग्राफी, आर्थिक अफरातफर अर्थात मनी लाँडरिंग असे गंभीर आरोप असल्यामुळे राज कुंद्रा आणि अभिनेत्री शिल्पा शेट्टी न्यायालयाच्या कचाट्यात सापडले आहेत. या प्रकरणात दिलासा मिळावा यासाठी शिल्पाने उच्च न्यायालयात दाद मागितली. पण शिल्पाचा हा प्रयत्न अयशस्वी झाला आहे.
मुंबई पोलिसांच्या आर्थिक गुन्हे शाखेने राज कुंद्रा आणि शिल्पा शेट्टी या दोघांविरोधात लूकआऊट नोटीस अर्थात दिसताक्षणी अटक करण्यासाठी वॉरंट काढले आहे. यामुळे दोघेही न्यायालयीन परवानगी शिवाय परदेशी जाऊ शकत नाहीत. या पार्श्वभूमीवर एका इव्हेंटचे कारण देत शिल्पा शेट्टीने २५ ते २९ ऑक्टोबर या काळात कोलंबोला जाण्यासाठी न्यायालयाकडे परवानगी मागितली आहे. फोनवरुन आमंत्रण मिळाले आहे असे कारण देत आमंत्रण पत्रिका सादर करणे अशक्य आहे, असेही शिल्पाच्यावतीने न्यायालयाला सांगण्यात आले. यानंतर मुंबई उच्च न्यायालयाने शिल्पाला आधी साठ कोटी रुपये न्यायालयीन कस्टडीत जमा करा, असा आदेश दिला.
नेमके काय आहे प्रकरण ?
राज आणि शिल्पा यांनी अपुरी माहिती देत दिशाभूल केली आणि ६० कोटींची गुंतवणूक करण्यास भाग पाडले अशी तक्रार दीपक कोठारी यांनी केली. या तक्रारीचा तपास करुन मुंबई पोलिसांच्या आर्थिक गुन्हे शाखेने राज आणि शिल्पा विरोधात कायदेशीर कारवाई सुरू केली. दोघांविरोधात लूकआऊट नोटीस काढण्यात आली. यामुळे परदेशी जाणे राज कुंद्रा आणि शिल्पा शेट्टीसाठी अशक्य झाले. या पार्श्वभूमीवर शिल्पा शेट्टीने न्यायालात दाद मागितली आहे. परदेशी जाण्यासाठी परवानगी मिळावी म्हणून शिल्पा प्रयत्न करत आहे. पण उच्च न्यायालयाने अद्याप शिल्पाला दिलासा दिलेला नाही.