मुंबई : भारत दौऱ्यावर आलेले ब्रिटनचे पंतप्रधान कीर स्टार्मर यांचे आज मुंबईतील छत्रपती शिवाजी महाराज आंतरराष्ट्रीय विमानतळावर आगमन झाले. यावेळी महाराष्ट्र व गुजरातचे राज्यपाल आचार्य देवव्रत व मुख्यमंत्री देवेंद्र फडणवीस यांनी स्टार्मर यांचे स्वागत केले.
उपमुख्यमंत्री एकनाथ शिंदे, उपमुख्यमंत्री अजित पवार, राजशिष्टाचार मंत्री जयकुमार रावल तसेच शासनाच्या वरिष्ठ अधिकाऱ्यांनी देखील त्यांचे पुष्पगुच्छ देऊन स्वागत केले.
पंतप्रधान म्हणून स्टार्मर यांचा हा पहिला अधिकृत भारत दौरा असून, हा दौरा भारत-ब्रिटन संबंधांना नवी दिशा देणारा ठरणार आहे.
पंतप्रधान मोदी ९ ऑक्टोबर रोजी सकाळी १० वाजता मुंबईत ब्रिटिश पंतप्रधान कीर स्टार्मर यांचे स्वागत करतील. त्यानंतर दोन्ही देशांचे पंतप्रधान दुपारी १:४० वाजता मुंबईतील जिओ वर्ल्ड सेंटर येथे आयोजित 'सीईओ फोरम'ला उपस्थित राहतील. तसेच, दुपारी २:४५ वाजता ते सहाव्या ग्लोबल फिनटेक महोत्सवात सहभागी होऊन उपस्थितांना संबोधित करतील.
धोरणात्मक भागीदारीचा 'व्हिजन २०३५' आराखडा
या भेटीदरम्यान, दोन्ही नेते 'व्हिजन २०३५' या पथदर्शी आराखड्याच्या अनुषंगाने भारत आणि ब्रिटनमधील सर्वसमावेशक धोरणात्मक भागीदारीच्या प्रगतीचा आढावा घेतील. व्हिजन २०३५ हा व्यापार, गुंतवणूक, तंत्रज्ञान, संरक्षण, हवामान, ऊर्जा, आरोग्य आणि शिक्षण यांसारख्या प्रमुख स्तंभांवर लक्ष केंद्रित केलेला १० वर्षांचा कालबद्ध मार्गदर्शक आराखडा आहे.