चिकन वडा पाव

साहित्य :

२५० ग्रॅम बोनलेस चिकन खिमा
१ टेबलस्पून आलं-लसूण पेस्ट
१ लहान कांदा बारीक चिरलेला
१ टेबलस्पून कसुरी मेथी
२-३ टेबलस्पून चिरलेली कोथिंबीर
१ टेबलस्पून धने पावडर
१/२ टेबलस्पून लाल तिखट
१ टेबलस्पून एव्हरेस्ट चिकन मसाला
१ टीस्पून गरम मसाला
चवीप्रमाणे मीठ
१ कप बेसन पीठ
१ टीस्पून लाल तिखट
१/४ टीस्पून हळद
१ टीस्पून ओवा
चवीप्रमाणे मीठ
लागले तेवढे पाणी
तळण्यासाठी तेल
हिरव्या चटणीसाठी कोथिंबीर, पुदिना हिरवी मिरची, लसूण, लिंबू, मीठ
टोमॅटो सॉस किंवा केचप
लादी पाव

कृती :

प्रथम बेसन पीठ भिजवून घ्यावे. एका बाऊलमध्ये बेसन पीठ घेऊन, त्यात हळद, लाल तिखट, मीठ, हातावर चोळून ओवा घालावा. सर्व कोरडं मिश्रण व्यवस्थित मिक्स करून घ्या. थोडे थोडे पाणी घालत, वड्याला जसे पीठ भिजवतो तसे भिजवून घ्या. चिकन खिमा एका बाऊलमध्ये घेऊन त्यात आलं लसूण पेस्ट,धने पावडर, लाल तिखट, गरम मसाला, चिकन मसाला, कसुरी मेथी, चवीप्रमाणे मीठ, बारीक चिरलेला कांदा, कोथिंबीर सर्व घालून घ्या. मिश्रण व्यवस्थित मिक्स करून घेणे त्याचे छोटे छोटे गोळे करून घ्या. कोथिंबीर, पुदिना, हिरवी मिरची, लसूण, लिंबू व मीठ, पाणी घालून हिरवी चटणी वाटून घ्या. कढईत वडे तळता येतील इतकं तेल घेऊन गॅसवर गरम करायला ठेवून द्या. बेसन पीठ हाताने व्यवस्थित फेटून घ्या. चिकनचा गोळा घेऊन पिठात घोळवून, तेलामध्ये सोडा. दोन्ही बाजूने लालसर होतील असे, मध्यम आचेवर वडे तळून घेणे. लादी पाव घेऊन सुरीने मधोमध कापून घेणे. पावाच्या एका बाजूला हिरवी चटणी आणि दुसऱ्या बाजूला लाल चटणी किंवा केचप लावून घ्या. पावात वडा ठेवून गरमागरम खायला द्या.