मच्छीमार बांधवांचा संवाद साधत उपाययोजना करण्याचे आश्वासन
छत्रपती संभाजीनगर (प्रतिनिधी) : मत्स्यव्यवसाय मंत्री नितेश राणे यांनी छत्रपती संभाजीनगर जिल्ह्यातील फुलंब्री धरण परिसरातील मच्छीमारांच्या नुकसानग्रस्त भागांची शुक्रवारी प्रत्यक्ष पाहणी केली. या पाहणीत मंत्री राणे यांनी मच्छीमार बांधवांशी थेट संवाद साधून त्यांच्या अडचणी, समस्यांचा आढावा घेतला आणि तातडीने उपाययोजना करण्याचे आश्वासन दिले.
पाहणीदरम्यान, नुकसानग्रस्त मच्छीमारांच्या समस्या समजून घेतल्या गेल्या आणि त्यांचे जीवनमान सुधारण्यासाठी आवश्यक प्रशासनिक पावले, मदत आणि सहाय्य यावर चर्चा करण्यात आली. मंत्री राणे यांनी संबंधित अधिकाऱ्यांना पंचनामा तातडीने, अचूक व पारदर्शक पद्धतीने करण्याच्या ठोस सूचना दिल्या, जेणेकरून नुकसानाचे अचूक दस्तऐवजीकरण होईल आणि त्यानंतर योग्य आर्थिक व प्रशासनिक मदत पोहोचवता येईल.
सदर पाहणीदरम्यान स्थानिक आमदार अनुराधा चव्हाण, मत्स्यव्यवसाय आयुक्त किशोर तावडे, तसेच इतर संबंधित शासकीय अधिकारी उपस्थित होते. सर्व उपस्थितांनी नुकसानग्रस्त मच्छीमारांच्या अडचणींवर चर्चा केली आणि त्यांच्या तातडीच्या मदतीसाठी प्रशासनाची तत्परता यावर भर दिला.