मुंबई : बॉलिवूड अभिनेत्री आणि अभिनेता अनिल कपूर यांची मुलगी सोनम कपूर हिच्या घरी पुन्हा एकदा आनंदाचे क्षण येणार असल्याचे बोलले जात आहे. मिळालेल्या माहितीनुसार, सोनम कपूर आणि तिचा पती आनंद आहूजा आपल्या दुसऱ्या बाळाच्या आगमनाची वाट पाहत आहेत. याबद्दल ती लवकरच अधिकृत घोषणा करणार असल्याची शक्यता आहे.
सोनम आणि आनंद आहूजा यांनी २०१८ मध्ये लग्न केले. २०२२ मध्ये त्यांच्या पहिल्या बाळाचा वायुचा जन्म झाला. आई झाल्यापासून तिच्या आयुष्यात मोठा बदल झाल्याचे ती अनेक वेळा सांगत आली आहे. आता ती दुसऱ्यांदा मातृत्वाचा अनुभव घेणार असल्याचे वृत्त समोर आले आहे. सोनम आणि आनंद सध्या लंडनमध्ये वास्तव्यास असून, त्यांचे मुंबई आणि दिल्लीमध्ये सततचे येणेजाणे असते.
सोनमने आपल्या पहिल्या बाळासोबतचे अनेक खास क्षण सोशल मीडियावर शेअर केले आहेत. आपल्या मुलाचा वाढदिवस साजरा केल्यानंतर काही आठवड्यांतच तिच्या दुसऱ्या गरोदरपणाच्या चर्चांना उधाण आले आहे. ‘ऑगस्ट महिना म्हणजे वायुचा महिना’ असं म्हणत तिने वायुसोबतचे फोटो शेअर करत भावनिक पोस्टही लिहिली होती.
मिळालेल्या माहितीनुसार, सोनम सध्या साधारण तीन महिन्यांची गर्भवती आहे. अधिकृत घोषणा अद्याप झाली नसली तरी, चाहत्यांमध्ये ती कधी ही गोड बातमी शेअर करणार, याची उत्सुकता आहे.
सोनमने २००७ मध्ये 'सांवरिया' या चित्रपटातून बॉलिवूडमध्ये पदार्पण केलं होतं. त्यानंतर तिने 'आएशा', 'खूबसूरत', 'वीरे दी वेडिंग', 'दिल्ली-६' अशा अनेक चित्रपटांमध्ये काम केलं. सोनम आणि आनंद या जोडीला बॉलिवूडमधील एक परफेक्ट कपल म्हणून ओळखले जाते.
सध्या सोनमच्या दुसऱ्या बाळाच्या चर्चांमुळे तिच्या चाहत्यांमध्ये आनंदाचे आणि उत्सुकतेचे वातावरण आहे. लवकरच कपूर-आहूजा कुटुंबात पुन्हा एक नवा पाहुणा येण्याची शक्यता वर्तवली जात आहे.