मुंबई : महिला क्रिकेटमधील सामर्थ्य, एकता आणि थांबवता न येणाऱ्या जिद्दीचा उत्सव साजरा करत, इंटरनॅशनल क्रिकेट कौन्सिल (ICC) ने आज आयसीसी महिला क्रिकेट विश्वचषक २०२५ साठी अधिकृत गाण्याचे अनावरण केले आहे. ‘ब्रिंग इट होम’ या नावाने प्रसिद्ध होणारे हे गाणे जगभरातील चाहत्यांना एकत्र आणण्याच्या उद्दिष्टाने बनवण्यात आले आहे.
प्रसिद्ध गायिका श्रेया घोषाल यांनी हे गाणे गायले असून, त्यात ऊर्जा, भावना आणि संगीताचा सुंदर संगम पाहायला मिळतो. गाण्यातील प्रत्येक बोल हे महिला क्रिकेटपटूच्या संघर्षाची आणि स्वप्नांची आठवण करून देतात.
गाण्याचे बोल जिद्द, एकता आणि चिकाटीचे प्रतीक आहेत. “पत्थर पिघलाना है, एक नया इतिहास बनाना है” असे बोल महिला क्रिकेटच्या उत्क्रांतीला सलाम करत, कठीण परिस्थितीतही हार न मानणाऱ्या वृत्तीचे प्रतीक आहेत.
प्रेक्षकांना हे गाणे आणि त्याचे बिहाइंड-द-सीन्स व्हिडिओ पाहण्यासाठी विविध डिजिटल प्लॅटफॉर्मवर उपलब्ध आहे. Spotify, Apple Music, Amazon Music, JioSaavn, YouTube Music, Instagram, Facebook आणि इतर ठिकाणी.
श्रेया घोषाल म्हणाल्या: “आयसीसी महिला क्रिकेट विश्वचषक २०२५ चा भाग बनणे आणि त्याच्या अधिकृत गाण्याद्वारे महिला क्रिकेटचा आत्मा, ताकद आणि एकतेचा उत्सव साजरा करणे, हे माझ्यासाठी अभिमानास्पद आहे. या गाण्याला आवाज देताना मी खूप प्रेरित झाले आणि मला आशा आहे की हे गाणे चाहत्यांना प्रेरणा देईल आणि या भव्य स्पर्धेचे अविस्मरणीय क्षण निर्माण करेल.”
आयसीसी महिला क्रिकेट विश्वचषक २०२५ च्या १३ व्या सीजनसाठी तिकीट दर अगदी कमी ठेवण्यात आले आहेत. हे दर फक्त ₹१०० पासून सुरू होत आहेत, जे आयसीसीच्या कोणत्याही जागतिक स्पर्धेसाठी सर्वात कमी आहेत. तिकीट विक्रीला सुरुवात झाली असून ती सर्व चाहत्यांसाठी खुली आहे. Tickets.cricketworldcup.com वर तिकीटे उपलब्ध आहेत.
हे सामने ३० सप्टेंबर ते २ नोव्हेंबर २०२५ दरम्यान होणार असून सामने डीवाय पाटील स्टेडियम (नवी मुंबई), एसीए स्टेडियम (गुवाहाटी), होळकर स्टेडियम (इंदूर), एसीए-व्हीडीसीए स्टेडियम (विशाखापट्टणम) आणि आर. प्रेमदास स्टेडियम (कोलंबो, श्रीलंका) येथे खेळवले जाणार आहेत.