"पाटील, ९६ कुळी, क्षत्रिय तुम्ही राहिले नाहीत, तर मग आपल्यात ११ विवाह जाहीर करू": लक्ष्मण हाकेंचा टोला
बीड: ओबीसी नेते लक्ष्मण हाके यांनी मनोज जरांगे पाटील यांच्यासमोर ओबीसी समाजातील तरुणांच्या लग्नाचा जाहीर सभेतून प्रस्ताव मांडला आहे. ते म्हणाले, "कुणबी प्रमाणपत्राद्वारे तुम्ही ओबीसीमध्ये आला आहात. तर आम्ही आमच्यातील क्वालिफाईड पोरं सुचवतो. आता पहिले ११ विवाह आप आपल्यामध्ये ठरवूयात, तुम्ही आमच्यात आले आहात, आता जात पात राहिली का? पाटील, ९६ कुळी, क्षत्रिय तुम्ही राहिले नाही तर मग आपल्यात ११ विवाह जाहीर करू" असे थेट आवाहन करत लक्ष्मण हाके यांनी ओबीसी समाजातील तरुणांच्या लग्नाचा जाहीर सभेतून प्रस्ताव दिला आहे.
ओबीसी आंदोलक लक्ष्मण हाके यांनी मराठा आंदोलक मनोज जरांगे पाटील यांचा कुणबी प्रमाणपत्राद्वारे ओबीसीत घुसखोरी करण्यासंदर्भात जाहीर सभेत खरमरीत समाचार घेतला. बीड दौऱ्यावर, गेवराईतील शृंगारवाडी येथे काल ओबीसी महाएल्गार मेळाव्याच्या आयोजनादरम्यान त्यांनी मनोज जरांगे पाटील यांवर निशाणा साधला.
हाके यांनी जरांगेंना डिवचले
तुम्ही आता आमच्यात आले ना तर अकरा विवाह तुमच्या आमच्यात करून त्या आधी जाहीर करा, हाके यांनी असे बोलत थेट जरांगेंना डिवचल्याचे दिसून आले. लग्न ठरवायची वेळ आली की आम्ही ९६ कुळी, मराठा, क्षत्रिय! आणि गावच्या सरपंच पदाची निवडणूक आली की आम्ही ओबीसी मागासवर्गीय. हे मी बोललो नाही बरं का, ते हे स्वर्गीय एनडी पाटील बोलायचे. जात चोरांनो तुम्हाला मागासपणाचे डोहाळे लागले असल्याचे म्हणत हाके यांनी जरांगे पाटलांना लक्ष केले.
यावेळी बोलताना हाकेंनी थेट अजित पवारांनाच आव्हान दिल्याचे दिसून आले. अजित दादा मी गाजत वाजत बारामतीच्या पोलीस स्टेशनला येणार आहे. यावेळी त्यांनी मराठा आंदोलन मनोज जलांगे यांचा देखील समाचार घेतला.
पुढे बोलताना हाकेंनी आज बीड जिल्ह्यातील मराठा लोकप्रतिनिधींवरदेखील निशाणा साधल्याचे दिसून आले. गेवराईचा आमदार जातीवादी आहे. असे म्हणत त्यांनी चंदनचोर सोनवणे तुझं शिक्षण किती? असे म्हणत खासदारावरही टीका केली.
हाके यांच्या या जोरदार टिकेनंतर जरांगे पाटील त्यांना काय प्रतिक्रिया देतायत? यावर मराठा आणि ओबीसी यांच्यातील आरक्षण वाद अवलंबून असणार आहे.