कल्याण: कल्याणमधील रामदेव या नामांकित शाकाहारी हॉटेलसंबंधित एक धक्कादायक माहिती समोर येत आहे. या हॉटेलच्या फ्राइड राईसमध्ये झुरळ आढळल्याचा आरोप एका ग्राहकाने केला आहे. मुळात हे हॉटेल कल्याण शहरातील जूने आणि प्रचलित हॉटेल असल्याकारणांमुळे ही बातमी अनेकांसाठी धक्का देणारी ठरत आहे.
याच हॉटेलमध्ये काही दिवसांपूर्वी एका ग्राहकाच्या जेवणामध्ये लोखंडाचा तुकडा आढळल्याची घटना घडली होती, हे प्रकरण ताजे असतानाच, आता पुन्हा एकदा रामदेव हॉटेलमधील फ्राईड राईसमध्ये झुरळ आढळल्याची घटना घडली आहे. ज्यामुळे ग्राहकांकडून या घटनेचा संताप व्यक्त केला जात आहे.
पार्सल फ्राईड राईसमध्ये झुरळ
निकिता जाधव या कल्याणच्या रामदेव हॉटेलमध्ये पार्सल घ्यायला गेल्या होत्या. त्यांनी फ्राईड राईस मागवला असता त्यामध्ये झुरळ आढळले. धक्कादायक बाब म्हणजे तो फ्राईड राईस त्यांच्या मुलांनी खाल्ला आहे. मुलांना फ्रुड पॉइझन झाले तर याला जबाबदार कोण? असा सवाल उपस्थित केला आहे. या प्रकरणी पोलिसांत तक्रार दाखल करण्यात येणार असल्याची माहिती जाधव यांनी दिली आहे. सलग घडणाऱ्या घटनांमुळे रामदेव हॉटेलच्या स्वच्छता व्यवस्थेवर गंभीर प्रश्नचिन्ह निर्माण झाले असून, ग्राहकांमध्ये तीव्र नाराजी पसरली आहे.