पुणे : सध्या पावसाळी पर्यटनाला चेव फुटला असून, अनेक पर्यटनप्रेमी गड किल्ल्यांवर तसेच निसर्सरम्य ठिकाणी जात आहेत. मात्र, या दरम्यान योग्य काळजी घेतली नाही तर अपघात होण्याच्या घटना अनेकदा घडतात. अशीच एक घटना पुण्यातील सिंहगड येथून समोर येत आहे.
पावसाळी पर्यटनासाठी सिंहगड किल्ला प्रसिद्ध असून या परिसरात दरवर्षी देशाच्या कानाकोपऱ्यातून पर्यटक येत असतात. त्यानुसार या वर्षी देखील सिंहगडावर पर्यटकांची प्रचंड गर्दी पाहायला मिळत आहे. मात्र यादरम्यान, आपल्या मित्रांसोबत सिंहगड किल्ल्यावर पर्यटनाचा मनमुराद आनंद लुटायला आलेला, एक युवक गडावरील तानाजी कड्यावरून पाय घसरून खोल दरीत कोसळल्याची दुर्दैवी घटना घडली आहे. गौतम गायकवाड (वय २४) असे बेपत्ता तरुणाचे नाव असून त्याच्यासाठी शोधमोहिम राबवली जात आहे. गौतम हा हैदराबादवरुन मित्रांसमवेत पर्यटनास आला होता.
घटनास्थळी आपत्ती व्यवस्थापन आणि ग्रामीण पोलीस कर्मचारी, व स्थानिक गिर्यारोहक कार्यकर्ते या तरुणाचा रात्री उशिरापर्यंत शोध घेत होते. जवळपास एक हजार फुटापर्यंत खोल दरीत उतरून आपत्ती व्यवस्थापन पथकाने शोध घेण्याचा प्रयत्न केला. खोल दरीत जाऊन मुसळधार पाऊस, वाऱ्यात बेपत्ता गौतमचा शोध घेतला. मात्र रात्रीच्या अंधारात तो आढळून न आल्याने रात्री ११ वाजता शोधकार्य थांबवले. त्यानंतर, आज सकाळी ६ वाजता पुन्हा शोधकार्य सुरू करण्यात आलं आहे. सायंकाळी ४ वाजेपर्यंत गौतमचा अद्याप शोध लागलेला नाही.
मिळालेल्या माहितीनुसार, सिंहगड किल्ल्याच्या तानाजी कडा येथे हवा पॉइंटजवळील खोल दरीत पाय घसरून पडल्याने एक युवक बेपत्ता झाला असून घटनास्थळी प्रशासन व पोलीस (Police) कर्मचारी पोहोचले आहेत. हैदराबाद येथून गौतमसह ५ जणांचा ग्रुप पुणे येथे फिरण्यासाठी आला होता. काल बुधवारी दुपारी ४.३० वाजता ते सिंहगडावर आले, या वेळेस सायंकाळच्या सुमारास तानाजी कड्याजवळ येऊन ते पर्यटनाचा आनंद घेत होते. त्यावेळी, गौतमने लघवीला जाऊन येतो असे मित्रांना सांगितले. मात्र, बऱ्याच वेळानंतरही तो परत आला नाही. त्यामुळे मित्रांनी गौतमचा शोध घेतला असता तो कुठेही आढळून आला नाही. जवळच हवा पॉइंटशेजारी त्याची चप्पल सापडली, मात्र तो दिसला नाही. सिंहगड भागात मुसळधार पाऊस असून, वाऱ्याचा वेगही जास्त आहे. वाऱ्याचा व जमिनीचा अंदाज न आल्याने गौतम खोल दरीत कोसळला असावा असा अंदाज त्याच्या मित्रांकडून लावला गेल्याने गौतमचा शोध घेतला जात आहे.