बेंगळुरू: शुक्रवारी बेंगळुरूमधील विल्सन गार्डनच्या चिन्मयनपाल्य भागात झालेल्या सिलेंडर स्फोटात एका १० वर्षीय मुलाचा मृत्यू झाला आणि १२ जण जखमी झाल्याचे वृत्त आहे. सदर घटना नेमकी १५ ऑगस्ट रोजी घडल्यामुळे परिसरात हळहळ व्यक्त केली जात आहे. सदर घटनेची खबर मिळताच, कर्नाटकचे मुख्यमंत्री सिद्धरामय्या यांनी विल्सन गार्डनमध्ये घटनास्थळी भेट देऊन प्रकरणाची चौकशी केली. स्फोटातील जखमींना तात्काळ जवळच्या रुग्णालयात दाखल करण्यात आले आहे.
सिलिंडरच्या भीषण स्फोटात अनेक घरांचे नुकसान
सिलेंडर स्फोटाची ही घटना दाट लोकवस्ती असलेल्या निवासी भागात घडली, जिथे घरे एकमेकांना लागून होती. स्फोट इतका जोरदार होता की ८ ते १० घरांचे नुकसान झाले. जेव्हा स्फोट झाला तेव्हा एकामागून एक सर्व घरांनी पेट घेतला आणि ही सर्व घरं पत्त्यासारखी कोसळली. अचानक घडलेल्या या घटनेमुळे अपघातस्थळी एकच गोंधळ उडाला आणि स्थानिक लोक जीव वाचवण्यासाठी घराबाहेर पडले.
अग्निशमन विभागाच्या अधिकाऱ्यांचे म्हणणे आहे की, प्राथमिक तपासात सिलेंडरमधून गॅस गळती हे स्फोटाचे कारण मानले जात आहे. स्फोटानंतर ढिगाऱ्यात अडकलेल्या लोकांना बाहेर काढण्यासाठी अग्निशमन दल आणि बचाव पथके सतत काम करत आहेत. पोलिस घटनेचा तपास करत आहेत. अधिकाऱ्यांनी सांगितले की, इतर कोणताही अपघात होऊ नये म्हणून जवळपासची घरे रिकामी करण्यात आली आहेत. पोलिसांनी घटनेचा तपास सुरू केला आहे आणि गॅस पुरवठ्याशी संबंधित सर्व पैलू तपासले जात आहेत.