मुंबई: प्रत्येकालाच आयुष्यात एकदा तरी 'घबाड' मिळावं आणि रातोरात श्रीमंत व्हावं असं वाटतं. अशाच एका घबाडाच्या शोधावर आधारित ‘घबाडकुंड’ हा आगामी मराठी चित्रपट लवकरच प्रेक्षकांच्या भेटीला येत आहे. दिग्दर्शक प्रीतम एस.के. पाटील आणि निर्माते रसिक कदम यांच्या या सस्पेन्स थ्रिलर चित्रपटाने प्रदर्शनाआधीच चर्चेत येण्यास सुरुवात केली आहे. विशेष म्हणजे या चित्रपटासाठी पुण्याजवळील खेड-शिवापूर येथे एक भव्यदिव्य आणि नेत्रदीपक सेट उभारण्यात आला आहे.
‘अल्याड पल्याड’ या यशस्वी चित्रपटानंतर प्रीतम पाटील पुन्हा एकदा सस्पेन्स थ्रिलर घेऊन येत आहेत. ‘घबाडकुंड’ या चित्रपटाचे शीर्षकच खूप लक्षवेधी आहे. घबाड म्हणजे अचानक मिळणारी धनप्राप्ती आणि कुंड म्हणजे विहीर किंवा खोलगट जागा. या दोन्हीचा मेळ घालून या चित्रपटाची कथा गुंफण्यात आली आहे. भव्य सेटवर गूढ दृश्यांचे चित्रीकरण.
मराठी चित्रपटसृष्टीत प्रथमच इतका भव्य सेट तयार करण्यात आला आहे. सुमारे १० ते १२ हजार स्क्वेअर फूट जागेवर हा सेट उभारला आहे. यामध्ये पाण्याची कुंड, खोल विहिरी, पुरातन मंदिरे आणि गुहांचे बांधकाम करण्यात आले आहे. या सेटवर अनेक गूढ आणि रहस्यमय दृश्यांचे चित्रीकरण होणार आहे, ज्यामुळे प्रेक्षकांना ‘लार्जर दॅन लाईफ’ अनुभव मिळेल.
स्टारकास्ट आणि टीम
चित्रपटात कलाकारांची मोठी फौज आहे. यात देवदत्त नागे, कुशल बद्रिके, संदीप पाठक, शशांक शेंडे, प्राजक्ता हनमघर, स्मिता पायगुडे-अंजुटे, वैष्णवी कल्याणकर आणि इतर कलाकार आहेत. चित्रपटाचे दिग्दर्शन प्रीतम एस.के. पाटील यांनी केले आहे, तर रसिक कदम आणि स्मिता पायगुडे-अंजुटे यांनी निर्मितीची धुरा सांभाळली आहे.
‘घबाडकुंड’ हा चित्रपट रहस्य, थरार, विनोद आणि नात्यांची गुंतागुंत अशा अनेक गोष्टींनी परिपूर्ण असणार आहे. हा चित्रपट मराठीसोबतच हिंदी आणि तेलगू या तीन भाषांमध्ये प्रदर्शित होणार आहे. नवीन वर्षाच्या सुरुवातीला हा बिगबजेट चित्रपट प्रेक्षकांच्या भेटीस येण्याची शक्यता आहे. या चित्रपटाच्या माध्यमातून मराठी चित्रपटसृष्टीतही भव्य कॅनव्हास दाखवण्याचा प्रयत्न असल्याचे दिग्दर्शक प्रीतम पाटील यांनी सांगितले.