मुंबई : मॉडेल आणि फॅशन कोरिओग्राफर रोहित पवार आता मराठी रुपेरी पडद्यावर पदार्पण करत आहे. येत्या १ ऑगस्ट रोजी प्रदर्शित होत असलेल्या 'अवकारीका' या मराठी चित्रपटात तो एका महत्त्वाच्या भूमिकेत दिसणार आहे. या चित्रपटात रोहित अभिनेता विराट मडकेसोबत स्क्रीन शेअर करणार आहे. रेडबड मोशन पिक्चर या बॅनरखाली निर्मित आणि अरविंद भोसले दिग्दर्शित 'अवकारीका' हा चित्रपट सामाजिक संदेश देणारा आहे.
चित्रपटाची निर्मिती भारत टिळेकर आणि अरुण जाधव यांनी केली असून, मनोज गायकवाड, अरविंद भोसले, मृणाल कानडे, आणि गीता सिंग यांची सहनिर्मिती आहे. आपल्या पदार्पणाबद्दल बोलताना रोहित पवार म्हणाला, "रेडबड मोशन पिक्चरसोबत माझं खूप वर्षांपासूनचं नातं आहे. माझ्या खडतर प्रवासात त्यांनी मला खूप आधार दिला. आर्थिक अडचणी आणि अपमान सहन करत असतानाही माझं ध्येय मात्र अढळ राहिलं. 'अवकारीका' हा माझ्यासाठी केवळ एक चित्रपट नाही, तर माझं स्वप्न आहे. माणूस म्हणून मी समाजासाठी काय देऊ शकतो, हा विचार मला 'अवकारीका'ने दिला."
या चित्रपटात रोहित एका चेंबर साफ करणाऱ्या स्वच्छतादूताची भूमिका साकारत आहे. या भूमिकेबद्दल तो म्हणाला, "शूटिंगदरम्यान मी या कामगारांना जवळून पाहिलं. त्यांच्या डोळ्यातील हतबलता, वेदना, आणि तरीही कामाप्रती असलेली निष्ठा पाहून मी हेलावून गेलो. हा चित्रपट करताना माझ्या डोळ्यात अनेकदा पाणी आलं. हा केवळ अभिनय नव्हता, तर त्यांच्या वेदनेचा, संघर्षाचा, आत्मसन्मानाचा एक अंश माझ्यात अनुभवण्याचा प्रवास होता."
'अवकारीका'ची कथा-पटकथा, संवाद आणि गीते अरविंद भोसले यांनी लिहिली आहेत. कैलाश खेर, सुनिधी चौहान आणि ज्ञानेश्वर मेश्राम यांच्या सुमधुर आवाजाने चित्रपटातील गाणी सजली आहेत. स्वच्छता कामगारांची व्यथा संवेदनशीलपणे मांडत, समाजाला आरसा दाखवणारा 'अवकारीका' हा चित्रपट येत्या १ ऑगस्ट रोजी सर्वत्र प्रदर्शित होत आहे.