ठाणे : सोमवारी ठाणे शहरात एमडी ड्रग्स आढळून आले आहे. हे सर्व ड्रग्स जप्त करण्याची कारवाई पोलिसांकडून करण्यात आली. तब्बल १ कोटी ६९ लाख २६ हजार रुपयांचे एमडी ड्रग्स जप्त करण्यात आले आहे. ठाणे गुन्हे शाखा घटक १ तर्फे ही कारवाई करण्यात आली.
ठाणे गुन्हे शाखेला गुप्त माहितीदारामार्फत माहिती मिळाली होती की मुंब्रा बायपास मार्गावर एक इसम त्याच्या वाहनांमधून एमडी हा अमली पदार्थ घेऊन जाणार आहे. या माहितीच्या आधारे ठाणे गुन्हे शाखेच्या पोलिसांनी मुंब्रा बायपास जवळ सापळा रचण्यात आला होता. त्यानुसार कारमधून संशयास्पदरित्या जाणाऱ्या मोहनलाल गुणेशाजी जोशी उर्फ शर्मा यास ताब्यात घेऊन गाडीची तपासणी करण्यात आली.
हा सर्व साठा हस्तगत करून त्याच्या विरोधात मुंब्रा पोलीस स्टेशनमध्ये गुन्हा नोंद करण्यात आला आहे. दरम्यान पोलिसांनी संशयित आरोपीला अटक केली असून आरोपींनी हा अमली पदार्थ कुठून आणला व कोणाला विक्री करणार होता याचा तपास पोलिस करत आहेत.
ठाणे पोलिस आयुक्तालय परिक्षेत्रामध्ये अमली पदार्थांच्या सेवांमध्ये तसेच विक्रीमध्ये मोठ्या प्रमाणात वाढ झाल्याने तरुण पिढी या अमली पदार्थांच्या आहारी जाताना दिसत आहे. अमली पदार्थांच्या सेवन व विक्रीवर तसेच नशामुक्त तरुण पिढी करण्याच्या अनुषंगाने ठाणे पोलीस आयुक्त आशुतोष डुंबरे यांनी सर्व विभागांना आदेश देत कारवाईचे निर्देश दिले होते.