चंदीगड : पाकिस्तानच्या इंटर-सर्व्हिसेस इंटेलिजेन्स (आयएसआय) साठी हेरगिरी करणाऱ्या भारतीय सैन्यातील जवानाला अटक करण्यात आली आहे. आरोपी जवानाचे नाव देविंदर सिगं असून तो संगरूर जिल्ह्यातील निहालगडचा रहिवासी आहे. पंजाब पोलिसांच्या स्टेट स्पेशल ऑपरेशन सेलने त्याला जम्मू-काश्मीरच्या बारामुल्ला जिल्ह्यातील उरी येथून १४ जुलै रोजी अटक केली आहे.
यासंदर्भात पंजाब पोलिसांनी जारी केलेल्या निवेदनानुसार हेरगिरीच्या आरोपाखाली ताब्यात घेतलेल्या माजी सैनिक गुरप्रीत सिंग उर्फ गुरी याच्या अटकेनंतर देविंदरला अटक करण्यात आली आहे. गुरप्रीत सिंगच्या चौकशीत असे आढळले की देविंदर फिरोजपूर तुरुंगात असताना लष्कराचे संवेदनशील कागदपत्रे मिळवण्यात त्याचा सहभागी होता. यातील गोपनिय माहिती त्याने आयएसआयला दिल्याचा आरोप आहे. देविंदर सिंगच्या अटकेनंतर, अधिकाऱ्यांनी त्याला १५ जुलै रोजी मोहाली न्यायालयात हजर केले.
न्यायालयाने आरोपीला अधिक चौकशीसाठी सहा दिवसांची पोलिस कोठडी दिली. सुरुवातीच्या तपासात असे दिसून आले आहे की देविंदर आणि गुरप्रीत यांची पहिली भेट २०१७ मध्ये पुण्यातील एका लष्करी छावणीत प्रशिक्षणादरम्यान झाली होती. त्यानंतर, दोघेही संपर्कात राहिले आणि नंतर त्यांना सिक्कीम आणि जम्मू आणि काश्मीरमध्ये तैनात करण्यात आले. भारतीय सैन्यात असताना, दोघांनाही गोपनीय लष्करी साहित्य उपलब्ध होते, ज्यापैकी काही गुरप्रीतने लीक केल्याचा आरोप आहे. हेरगिरी नेटवर्कमधील देविंदरची नेमकी भूमिका अद्याप तपासाधीन असल्याचे अधिकाऱ्यांनी सांगितले.
